لا تفكر ولا تحتار.. أضاحي الحكومة حطمت الأسعار

منافذ "أمان" والمجمعات الاستهلاكية وشوادر الزراعة.. تحارب الغلاء

الجودة عالية والأثمان خيالية والكميات كبيرة.. تنافس الجزارين وتواجه الاحتكار

البلدي بــ 115 جنيهاً والضأن بــ 120 والسوداني بــ 100.. مذبوحة وطازجة

"لا تفكر ولا تحتار لحوم الأضاحي في منافذ الحكومة حطمت سعر الجزار". تلك هو ما رصدته جولة "الجمهورية أون لاين"علي منافذ وشوادر الحكومة لبيع لحوم الأضاحي تزامنا مع قرب حلول عيد الأضحي المبارك.

حيث توافرت داخل منافذ "أمان" وزارة الداخلية. و المجمعات الاستهلاكية التابعة لوزارة التموين. وكذلك منافذ وزراة الزراعة. وشوادر محاربة الغلاء. كافة أنواع اللحوم الحمراء سواء "البلدية. أو الضأن. أو السوداني". بأسعار خيالية منافسة لسعر الجزارين في الأسواق. فضلا عن الجودة العالية .فبعد الحديث مع المواطنين المتواجدين للشراء. تبين أن فارق السعر يصل لحوالي 40 إلي 45%. فأسعار كيلو اللحوم البلدية تراوحت داخل تلك الأماكن مابين 115 إلي 130جنيهاً "حسب القطعية". وأما الضأن. فثبت السعر عند 120 جنيهاً للكيلو. وكان اللحم السوداني بسعر موحد 100جنيه. وبعد رصد حالة الرضاء لدي المواطنين المتواجدين وجاء علي لسانهم ردود الأفعال هذه.

المواطنون سعداء.. يشعرون بالرضا لوجود البديل

علي أبواب عدد من المجمعات الاستهلاكية بمنطقة الحلمية الجديدة بالقاهرة قال خالد محمود موظف: أول سنة اشتري من المجمعات الاستهلاكية. طول عمري بشتري من الجزراين. لكن بسبب غلاء أسعارهم وكيلو اللحمة اللي وصل عندكم 200 جنيه قررت اشتري من هنا. أنا عندي 5 بنات ومش ملاحق علي المصاريف. وكفاية كل حاجة غالية. والحمد لله لحمة العيد في المجمع بـ100 و115 جنيهاً للبلدي والضاني. عامل ميزانية 2500جنيه. هشتري 10كيلو بلدي و6 ضاني تقريبا. وشكرا للريس لأنه أوجد لنا البديل.

ياسمين محمد ربة منزل: علمت من جيراني أن لحوم الأضاحي متوفرة في المجمعات الاستهلاكية. وحضرت اليوم قبل زحام الأيام الأخيرة لشراء لحمة وكبدة وكلاوي. وعندما وجدت الأسعار 115 جنيهاً للكيلو. وهي أقل من سعر الجزراين في السوق بحولي 80جنيهاً. قمت بشراء لحمة العيد أيضا لابنتي المتزوجة. ولم يمانع البائع في أي كمية طلبتها.

ميرفت أحمد موظفة: معتادة دائما شراء اللحوم من الجمعية الاستهلاكية. حتي في الأيام العادية. لأنها أرخص وجيدة في ذات الوقت. وبمناسبة عيد الأضحي قررت شراء لحمة العيد من الجمعية كذلك لنفس السبب. السعر للحوم الكندوز والبلدي 115جنيهاً. اشتريت 10 كيلو. هي سعرها ارتفع شوية كانت 85 جنيهاً. لكن بالمقارنة بسعر السوق برا.. لا المجمعات رحمة طبعا. والحمد لله في بديل عن جشع الجزارين الكيلو عندهم وصل 200جنيه خارج طاقتنا وميزانينتا لا تسمح.

غالية محمد ربة منزل: ظروفنا مش زي الأول كل حاجة أسعارها نار. والناس غلابة. وتوفير لحوم العيد في المجمعات حاجة كويسة جدا. وجعلت في استطاعتنا شراء الكميات اللي تكفي احتياجنا في العيد وعزومات ولادي المتزوجين. ده موسم ولازم يجوا يعيدوا علينا وياكلوا اللحمة ويفرحوا هما وولاهم ربنا ما يقطع لهم عادة. ولولا توفر اللحمة بأسعار معقولة في المجمعات. كنا بقينا في مشكلة. نشكر المسئولين و"ريسنا " اللي عينه علينا وبيفرحنا كل مناسبة.

نبيلة البسيوني موظفة : حقيقي الكميات كبيرة وكل حاجة موجودة سواء لحوم أو كبدة. كلاوي. والناس هنا معاملتهم كويسة. طلبت 5 كيلو لحمة و2 كبدة. وهاجي اشتري تاني لأني كنت مارة بالصدفة ومش مستعدة للشراء. ولما وجدت منظر "لحمة العيد " يفتح النفس. والناس زحمة عليها. وقفت اشتريت. حاجة جميلة. رحمونا من الجزارين المستغلين.

بأحد منافذ وزارة الزراعة بمنطقة عابدين بالقاهرة أيضا. والتي طرحت كميات من لحوم الأضاحي بأسعار مخفضة عن الأسواق وقفت عزة إبراهيم ربة منزل ستينية وقالت : ربنا يبارك في الريس. وفر لحمة العيد علي أد أيدينا. الكيلو هنا بـ100و 110للبلدي والضاني بـ120 جنيه. اشتريت 10 كيلو كندوز و5 ضاني. كنا هنضطر نشتري من السوق بأسعار نار. ماهو موسم ولازم نشتري. لكن كنا هنانشتري كمية صغيرة. وبعد توافرها هنا بالسعر والجودة دي. كان لازم نشتري كميات كبيرة تكفي أيام العيد وتزيد. واحنا أفضل من غيرنا في دول جاعت بسبب الحرب بين روسيا وأوكرانيا. لكن الحمد لله عندنا كل حاجة موجودة ومتوفرة.

طارق محمود موظف: اللحوم الحمراء البلدي والضاني متوفرة وسعرها كويس 110. هشتري لحمة العيد كلها من هنا بصراحة معاملتهم كويسة ولحمتهم حلوة. لكن الأفضل بلاش جزئية وضع 100جرام دهن علي كل كيلو لحم. غير ذلك كل شيء تمام. ومشكورين عليه. ويكفي أنهم رحمونا من سعر السوق اللي كل يوم يزيد للحوم. وخاصة مع قرب عيد الأضحي. واشتريت اليوم 20كيلو ما بين لحم للخضار وبوفتيك وعرق فليتو .

أماني حسن بالمعاش: الأسعار حلوة. بشتري دايما منهم. خلاص نسيت الجزار. مافيش فرق بين اللحمة هنا ولحمة الجزار جربتهم أكثر من مرة حقيقي لحمة جميلة وطازجة. وكان لازم أجيب لحمة العيد منهم. وليه أشتري من جزار مستغل وأنا عندي بديل أرخص وجودة عالية "شكرا يا سيسي".

إسلام الجزار البائع قال: عندنا كل أنواع اللحوم وجاية" مدبوحة وطازة "من وزارة الزراعة. واللي الزبون يشاور عليه بياخده. البلدي الكندوز موجود. الضاني موجود. الكبدة الكلاوي. الممبار الفشة. الكوارع. يوجد أيضا اللحم السوداني بسعر 100 جنيه. وكل الأنواع متاحة. وأي كمية يطلبها الزبون ياخدها. مواعيدنا من 8 الصبح لـ12 مساء. ومستمريين حتي يوم وفقة عرفات.

أمام منافذ وشوادر "محاربة الغلاء "بمنطقة السيدة زينب. تكدس المواطنين لشراء لحمة العيد التي عُلِقت بكميات كبيرة. وقالت عزة سيد بالمعاش: اللحوم هنا أحسن حاجة. وأفضل بكثير عن تجربة معتادة شراءها من نفس المكان. وطعمها جميل. لذلك كنت ناوية شراء لحمة العيد منهم. مافيش مقارنة بسعر الجزار. عنده بـ180 و200. هنا بـ100جنيه. وبيديني من الحتة اللي عايزاها. مش بيقولي لاء علي أي حاجة. ولا أي كمية. ولا بيحط "دهن ". عشان كدة عندهم زحمة. الناس جت من الساعة 8 الصبح تحجز مكان. أشتريت 15 كيلو لي ولأولادي.

سامية محمد ربة منزل: جربت لحوم برا كتير. بصراحة عجبتني لحمة المكان هنا. وسعرهم كويس جدا 100جنيه البلدي. و120الضاني. السوق برا مافيش الأسعار دي خالص. كلهم جشعين .ومولعين الأسعار. وحجتهم ظروف الحرب. اشتريت جزء من لحمة العيد بالفلوس اللي متاحة معايا أخدت 8 كيلو بلدي. و2 ضاني ويارب عيد سعيد علي مصر وكل المصريين وبلدنا في أمن وأمان.

الزبائن: شكراً للريس.. ولحمة العيد تفتح النفس والناس عليها زحمة

انتصار عبد المولي ربة منزل: أنا بحب السيسي. وكويس جدا أنه وفر لنا بدائل عن التجار والجزارين الاستغلاليين. وكويس اننا لاقيين اللحمة وأن الحرب والأزمة الاقتصادية لم تؤثر علينا. واحنا عملنا زي ما " السادات "قال من زمان. لما اللحمة غلوها جنيه واحد. وقال ما تشتروش. وادينا سبناها للجزراين الجشعين وبنشري من منافذ وشوادر الحكومة.

محمد محمود صاحب عمل: أنا سعيد جدا بتوافر لحوم العيد بكل الكميات دي. وده يدل علي عمل وجهد وتنسيق وتخطيط في سبيل راحة الناس. وجعل كل السلع الغذائية متوفرة ومتاحة وأسعارها تكون في متناول أيديهم. من ضمنها اللحوم .خاصة ونحن علي أبواب موسم العيد وهو "عيد اللحمة" عندنا كلنا. فكل ذلك يتوجب الإشادة بكل من قام علي هذا الجهد. خاصة وما تم توفير واضح للعيان أنها لحوم جيدة وبلدية وسعرها 100و 120 جنيهاً. فهذه من الإيجابيات التي تستحق الإشارة إليها. وأتمني فقط زيادة عدد المنافذ لأن الشراء بالحجز واستلام أرقام بالدور من الساعات المبكرة.

في منافذ "أمان" التابعة لوزارة الداخلية. كانت كعادتها دائما مستمرة في دورها المجتمعي لمساندة المواطن في ظل موجات الغلاء تخفيفا عن كاهله. ومشاركة منها في كافة المناسبات. فطرحت كميات كبيرة وإضافية من اللحوم بمناسبة عيد الأضحي بأسعار مخفضة. وقالت صباح محمود ربة منزل التي وقفت علي أحد منافذ أمان بميدان العتبة : أسعار لحوم زمان. لم أتخيل بيع اللحوم في أمان بهذا السعر. 120 جينه لحم بلدي 130 لحم ضاني. ولحوم نضيفة وخدمة محترمة وتعامل راقي من البائعين. وفروا عليا مبلغ كبير كنت سأضطر لشراء لحمة العيد من الجزار. لكن مافيش مقارنة طبعا بين سعره وسعر" أمان ". أنا وفرت نص الميزانية تقريبا اللي كنت مخصصاها للحمة العيد عند الجزار بـ200 جنيه ويمكن يزودها أكتر الأيام الجاية عشان يستغل الموسم.

11 نصيحة من "الزراعة".. عند شراء لحوم العيد

تجنب المخضر المائل إلي الرمادي والداكن والمبلل

نشر مركز المعلومات الصوتية والمرئية بوزارة الزراعة واستصلاح الأراضي. والمكتب الإعلامي للوزارة. فيديو وانفوجراف. استعرض خلاله 11 نصيحة يجب مراعاتها لشراء لحوم ذات جودة عالية بمناسبة قرب حلول عيد الأضحي المبارك.

أوضح المركز أن النصائح هي الشراء من جزار موثوق لضمان جودة اللحم. تجنب شراء لحوم معروضة ومكشوفة خارج محال الجزارة. تقطيع اللحم حسب الاحتياج من مناطق محيط العضل والعظام. أن يكون اللحم فيه تداخل مع الدهن أما الدهن الخارجي فينبغي أن يكون متماسكًا وأبيض اللون مائل للاصفرار. أن يكون اللحم ذو لون وردي لا يلمع كثيرًا وتجنب اللحم المخضر المائل إلي الرمادي.

تابع المركز أنه علي المشتري. تجنب اللحم الداكن والرطب والمبلل واللزج عند لمسه. تكون الاختام علي الذبيحة واضحة. القوام متماسك لا يسهل قطعه بأظافر اليد. لا توجد مواد مخاطية أو هلامية أو منداة. عند الضغط علي اللحم بالاصبع لا يترك أثرًا غائرًا. وأخيرًا تجنب وجود الروائح الغريبة والكريهة.