أقصى حدود الشوف

ضلك عمود كهربا ...

بيونس الشارع

المجروحين م الندى ..

والهربانين م الخوف

قمر الليلة دي اختفى

وباين له مش طالع

بيني وبينك يدووووب

أقصى حدود الشوف ...

( عشمتني بالحلق ..

خرمت انا وداني ) *

ذغللتني بالنيون ..

وتركت قلبي بور

يا عتمة يا حنينه ..

لمي اللحاف لمي

وارمي الحمول ع الفقير

قومي احضني وضمي

مستنظرين الشتا ..

وف قلبي سهراية

ومودعين الصيف ..

في ضل نخلايه

خدعونا بالكهربا ...

حلم الصبايا الحور ..

لا لحقت أطول الدفا ...

ولا طلت اشوف النور

ولا كنت احس بطراوة ..

ف عز برد امشير

ولا كنت احس بحرارة ..

ف عز صيف هاتور .