احموا أحلامكم ومشاعركم
طريق السعادة
د. هالة منصور أستاذ علم الاجتماع
"الهوا هوايا أبنيلك قصر عالي واخطف نجم الليالي واشغلك عقد غالي يليق باحلي الصبايا".. فعلا إللي بيحب بيبقي نفسه يعمل كل حاجة لحبيبه. نفسه بجد يبني القصور. يخطف النجوم ليسعد حبيبه. بيدور علي السعادة في كل مكان وفي كل حاجة علي قدر ما يستطيع. يوهبه كل حاجة. حب وتقدير ومودة. بس الظروف والضغوط و الأعباء كبلت الجميع. تعبتنا كلنا. وبقينا في حيرة من أمر الحب وأمر التقدير للحبيب هل هو إمكانيات ولا قدرات ولا تمني ولا ثمن.
ساعات للأسف حولنا ولادنا لسلع ولادنا غاليين بكام ولادنا غاليين قوي اه بس مش بالفلوس عاوزين نغلي بناتنا اه بس والله مش بالشبكة ولا بالمؤخر ولا المقدم ولا القائمة ولا كل ده خالص ولادنا غاليين بالمحبة والمودة والمعزة والتقدير بأن كل واحد يبذل قصاري جهده في محاولة لاسعاد الآخر. الراجل الحق هو إللي بجد نفسه يبني لحبيبه القصر العالي وفعلا يخطف لها نجم الليالي علشان يسعدها ويشغل لها بيه العقد إللي تتمناه من المودة والتقدير والاعجاب والرضا والاكتفاء بيها عن كل نساء الدنيا بس بيعمل كل إللي يقدر عليه وطالما عمل كل اللي يقدر عليه بحب ومودة وتفاني لازم نستقبله منه بعرفان ومودة ورضا وحماية علشان ننمي جوا ولادنا إرادة تحويل الأحلام للحقائق بالجهد والمساندة والوقت والمثابرة والمحبة والتقدير واللي ما يقدرش يبعد ويدور علي اللي يقدر معاه وبيه.
احموا أحلامكم لمستقبل ولادكم ببيئة نفسية واجتماعية تسمح بتحقيقها. احموا مشاعركم الايجابية بتقليل سقف الطموحات وتهذيبها كي لا تتوحش علي امكانياتهم فتدمرها. اتركوا أبناءكم ليحددوا البدايات التي تحقق لهم أول طريق السعادة كي يسيروا ويستمروا فيه بمحبة ورضا وتذكروا بداياتكم ولا تفرضوا عليهم إن يبدأوا من حيث انتهيتم فلا تحملوا أنفسكم أو تحملوهم أكثر مما يجب في سبيل المظاهر والمبالغة وارضاء الآخرين والتقليد المبالغ فيه دون مراعاة الظروف والقدرات.
حاولوا أن تؤمنوا مستقبل أبنائكم بإنسانيتهم وحفظ كرامتهم وتقديرهم السليم لأنفسهم وأزواجهم كي يكونوا أسرا سليمة تحفظ لهم فرص السعادة في حسن الاختيار واحترام المودة ودوام المحبة والإيثار فهي الرصيد امام عواصف الظروف ومشاكل الحياة وأن يكون الحبيب فعلا يتمني بناء القصر العالي واختطاف نجم الليالي ليشغل به عقد حبيبته. وأن تكون هي قادرة علي تقدير ذلك واحترامه.. و للحديث بقية إن شاء الله.
