رئيس مجلس الإدارة
طارق لطفى
رئيس التحرير
أحمد سليمان
التسبيح و التأمل !
التسبيح بالنسبة لي مش مجرد عبادة ، التسبيح عندي اكتر من كدة بكتير و الحقيقة فوايده رائعة اما تتأمل فيها ..
التسبيح اولا عبادة سهلة باقدر اعملها في اي وقت .. و انا ماشية ، و انا باطبخ، و انا نايمة عشان اروح في النوم ، وانا قاعدة علي الكنبة و انا في العربية .. يعني دي عبادة تكسبك حسنات بسهولة في اي وقت ، مالهاش لبس او زي معين و لا توقيت معين ..
التسبيح بيشمل شكر الله علي النعم و التأمل فيها ، و الا يبقي مجرد ترديد لساني لكلمات ، و الشكر و التأمل دول ليهم عظيم الاثر في تغيير المود و التحول من الافكار السلبية الي الايجابية و تشتيت المخ عن ضغوط و توترات الحياة
التسبيح علي الايد او علي السبحة بيساعدك انك ما تسرحش لانك بتركز في حركة و عدد..
اما التسبيح علي الاصابع فبيخليك تضغط ضغطات بسيطة علي عقل الاصابع اللي بتحتوي علي مراكز الجسم كلها زي الكبد و الكلى و غيرها و بالتالي انت بتطبطب عليها و بتنشطها و بتغذيها بالذكر الايجابي الشريف دة و الحركة دي كمان بتساعدك انك تفصل عن الدنيا كلها
التسبيح بيخليك تفتكر و تستحضر النعم اما تحمد ربنا و بيخليك تستحضر الذنوب و تكرر استغفارك عنها فبالتالي بيرجعك ذهنيا و نفسيا للصراط المستقيم او للخطة اللي المفروض تكون ماشي عليها
التسبيح ممكن نطبقه علي مبدأ قانون الجذب لانك بتستحضر ايجابيات حياتك و دة بيظبط التردد و الذبذبة عندك علي موجة ايجابية و بيجذب لك باقي الافكار و الاحداث الايجابية .. التسبيح بيفكرك ان في رب تتكل عليه و ترمي همومك عليه ..رب فاكرك و مسلم له امرك فبتفوضه في امرك و انت واثق و مرتاح
عشان كل دة و اكتر التسبيح من اكتر العبادات اللي مذكورة في القران عند ذكر الضيق و الهم لان كل الفوايد اللي فاتت دي بتعم علي النفس الانسانية و بتنشطها بشكل ايجابي هائل و بتدرب مخك انه يفكر في ايجابيات الحياة مش في سلبياتها ، و دي نظرية كمان في علم النفس اكتشفوها و لقوا ان شكر النعم هو بالظبط بالنسبة للمخ زي نزول الجيم .. تدريب علي التفكير الايجابي لازم تمارسه يوميا.. فعلا سبحان الله الذي اوجب علينا عبادة سهلة و ثوابها كبير عشان تريحنا نفسيا و كمان يغفر لنا و يجازينا بيها ..
التسبيح نعمة في حد ذاته لازم تشكر ربنا عليها ..
