** بلد زي مصر فيه 105ملايين روح حاجة مش سهلة خصوصاً إذا كان البلد ده خارج من مؤامرة كانت هاتقسم وسطه نصين لولا ستر ربنا ووطنية وشجاعة جيشه.. ومن وجهة نظري اللي يتحمل مسئولية الشعب والبلد قلبه ميت وبيعشق تراب البلد ده.. مش عارف كتبت الكلام ده ليه لكنه اتكتب وخلاص ومش هامسحه.. وهاروح بقي للست "نحمده" وهي سايقة الميكروباص وملفوفة بكوفية ومش باينة إنها واحدة ست يقوم الرئيس السيسي يلمحها في مراية الميكروباص وتقف وتخيلوا البساطة تطلب من رئيس الجمهورية بتلقائية يتوسطلها عند أي معرض عشان تشتري عربية بالتقسيط.. يقوم الريس ربنا يجبر بخاطره ليوم الدين يجيبلها الميكروباص كاش.. وهو ده المواطن الإنسان عبدالفتاح السيسي.. وبعد يومين يفتتح شوية مشروعات محترمة وكعادته يناقش ويزنق المسئولين باستفسارات وأسئلة تدل علي أن كل حتة في البلد جوه دماغه وبيكشف المسئول اللي معندوش معلومات عن شغله.. وفي الفجر يحضر طابور الصباح مع طلبة الكليات العسكرية ثم يغادر للنمسا في أول زيارة ليستكمل بناء علاقات مصر وأفريقيا بأوروبا.. وهو ده القائد المتحمل للمسئولية الوطنية.. وبنحمد ربنا علي الإنسان والمواطن والرئيس.. وتحيا مصر. 
** لا يترك الرئيس مناسبة ولا مداخلة تليفزيونية إلا ويلقي بملحوظات عن سلبيات وأخطاء الإعلام .. وياما صوتنا اتنبح ونبهنا ولمحنا وقلنا وصرخنا إن الإعلام سبب مصايب البلد.. ولا حياة لمن تنادي .. كفاية المذيعين والمذيعات اللي ولعوها وشعللوها منورين أكبر وأغني الشاشات ولسه بيقبضوا ملايين.. عشان كده قلت إلحقونا بوزير إعلام فوراً وغيروا اسمه لأي حاجة تانية.. الحكاية سهلة والبرلمان متفهم لاحتياجات البلد.. وكان الله في عون البلد من ده إعلام..!! 
** أخويا "محمد" راح يعمل تحليل فيروس "سي" والحمدلله النتيجة سلبية.. شاف الزحمة في المكان وقاللي "لو السيسي معملش غير المشروع ده في حياته كفاية عليه".. قلت: إمال آلاف المشاريع التانية نقول عليه إيه.. ربنا يديله الصحة ويقويه علينا.. آمين. 
** لو ماكنش عندنا جيش وطني كده.. تفتكروا البلد كانت قامت لها قومة بعد مؤامرة يناير واللا وقفت علي رجليها تاني.. الجيش اشتغل في حماية البلد والشعب ووفر الأكل والشرب والبنزين والمرتبات وعمل الطرق والشقق والمصانع وأنفاق سيناء .. كل واحد يجاوب بينه وبين نفسه..!! 
** صعد محمد صلاح بفريق ليفربول لتصفيات أوروبا بهدف عبقري.. وعاتب الجمهور بنظرة قوية من "ملك مصري".. ثم منح فانلته لطفل أخذ يصرخ هو ووالده في هيستيريا شديدة "Mo" ..Thank you.. وبعدها فاز بلقب أحسن لاعب في أفريقيا.. اللي عاوز يعرف قيمة "مو" صانع السعادة ينزل القهاوي ساعة ماتش ليفربول.. ربنا يحفظك يابني. 
** مظاهرة حب وعشق قابلت الخطيب عند دخوله النادي.. الكل جري عليه بالأحضان وهاتك ياسيلفي وبوس وسلامات.. اللي يحبه ربه يحبب فيه خلقه.. حمدالله ع السلامة ياكابتن. 
** الأهلي.. جاي جاي.. الصبر طيب..!! 
** أعجبني مرتضي منصور في لقائه مع عبدالمحسن سلامة نقيب الصحفيين وتصفية الجو .. صدقتوني إنه دكر ومايتخافش عليه.. وأعجبني أمير مرتضي في مداخلته مع سيف زاهر "الناصح"..!! 
** إسعاد يونس.. صاحبة السعادة في أي مكان.. سيبك إنت.. الكاريزما من عند ربنا. 
** سماح عمار.. أميرة جمال.. شيما صابر.. أحسن من رجالة كتير بيقدموا برامج رياضية..!! 
** أسامة الشيخ بتاع "أون سبورت".. وحياة أغلي حاجة عندك.. الناس بتبوس إيدك تحرمهم من حاتم بطيشة.. حرام عليك ياراجل بقولك الناس طفشت من شاشتكم بسببه.. ومش عيب تلبي رغبة المشاهدين..!! 
** واضح إن الممثل محمد رمضان فرحان قوي بصباعه السبابة.. رافعه علي طول في كل الصور.. لو بيوجعه يستريح منه أحسن..!! 
** سبحان الله.. بيومي فؤاد كان كومبارس مع هاني رمزي في فيلم "سامي أكسيد الكربون" وبرضه كان دمه "500 كيلو".. دلوقتي بينزل من الحنفية..!!