شرم.. الإسكندرية.. وماسبيرو

** لما مصر نظمت بطولة أفريقيا عام 2006 كانت الظروف غير الظروف ومكنش فيه ألتراس ومهووسين ومتأجرين.. لكن الحمدلله مصر دلوقتي زي الفل والحياة ماشية ومحدش بيموت من الجوع.. وعشان معانا الرئيس السيسي إللي حاطط البلد والشعب في عينيه وحاطط بطولة أفريقيا لكرة القدم الجمعة الجاية تحت رعايته واهتمامه الشخصي يبقي مش بنشيل هم حاجة.. قوم إيه..كل مؤسسات الدولة بتشتغل لصالح البطولة وبتوفر كل حاجة لإنجاحها.. والباقي علي اللاعيبة يعملوا اللي عليهم وكفاية إن الريس قابلهم وشحنهم معنوياً بأن أهم حاجة يحافظوا علي صورة مصر قدام العالم ويقدموا الأداء الحلو.. وإحنا "الشعب وجمهور الكورة "لينا طلب زيادة "عاوزين البطولة ياولاد مصر". 

** أظن محدش ينكر إن الرئيس السيسي صاحب فكرة ومتابعة وتنفيذ كل المشروعات العملاقة اللي اتعملت وبتتعمل وعمرنا ماسمعناه بيقول "انا عملت".. يبقي ماينفعش أي حد مهما كان يطلع يتكلم عن المشروعات اللي مصر شافتها.. لأن ده سطو علي حق مش بتاعهم.. والمفروض يكلمنا عن اللي عمله هو..!! 

** قد إيه نبقي فخورين لما السيسي يكون أول رئيس يقف علي منصة البرلمان البيلاروسي.. والعالم يعرف إن مصر هاتبقي فعلاً قد الدنيا. 

** قواتنا المسلحة.. لاتفوت فرصة للتطوير والتحديث المستمر.. زيارات وزراءالدفاع للخارج تأتي دائماً للمصلحة العامة مش عشان فسحه ولا أجازة.. وده إللي مطمن الناس علي عيشتهم وأمنهم.. وتحيا مصر. 

** منذ 25يناير2011 بنتعرض لمؤامرات وحروب ملهاش عدد.. لكن دلوقتي بنشوف حرب الشائعات علي كل لون.. وبرضه مش قادرين علينا.. عمار ياأم الدنيا. 

** صدق اللي قال علي شرم الشيخ مدينة السلام.. مافي مؤتمر ولامهرجان دولي أو محلي إلا وكانت حاجة تشرفنا وتطول رقبتنا قدام الدنيا.. وعن نفسي شفت بعيني المحافظ خالد فودة بيشتغل إزاي وبيعمل إيه طول الوقت مش ساعة المؤتمرات بس عشان كده أي مدينة أو حتي قبيلة بجنوب سيناءمستعدة لأي مناسبة وفي أي وقت. 

** معندناش رأي في التغييرات الجايه غير الدعاء"يارب توعدنا بوزير إعلام من اللي قلبنا يحبه.. أحسن الحكاية بقت صعبة خالص".. آمين. 

** من الناس.. واحد بيكبش بالكوم.. والتاني خايف علي نفسه..والتالت شغال وخلاص..!! 

** بسم الله ماشاءالله.. الحالة الأمنية في أسكندرية علي أعلي مستوي.. الحياة مستمرة بالشوارع 24ساعة ونادراً مانسمع عن جريمة سطو أو سرقة بالإكراه.. ولما نتكلم عن تأمين مباريات كرة القدم حدث ولاحرج.. دماغ عالية قوي بتعمل ده.. إسكندرية ياعشيقتي يابختك باللواء محمد الشريف ورجالته. 

** الله الله الله عليكم يامصريين ياواعيين يافاهمين ياللي محدش يقرطسكم ولايضحك عليكم.. دفعتم 13مليون جنيه من عيديتكم عشان تشوفوا فيلم"الممر".. مش قلتلكم الأسبوع اللي فات شوفوا الفيلم هايعمل إيه.. هي دي السيما المحترمة اللي الناس عاوزاها وعقبال الدراما يااااارب.. إفهموا بقي يا"......"..!! 

** واحد ضحك علي الخواجة ماسبيرو وعاوز يطبق المادة "101" الخاصة بمواصفات المذيعات.. يانهار مش فايت.. لو ده حصل يبقي مفيش مذيعة توحد ربنا هاتفضل مكانها.. ياخواجة لازم تقعد في بيتكم.. كفاية لحد كده..!! 

** من بعد فيلمي" اللمبي واللي بالي بالك" قلت يادوبك الممثل ده تمامه كده ومش هايعدي.. وفي العيد اللي فات سقط فيلم"محمدحسين" بالعشرين صباع وعمل إتنين مليون جنيه عشان بطله خلاص جاب جاز والشويتين بتوعه "بخ" ومابقاش حد طايق يشوفه.. ولولا ذكاء وحنكة أحمد السبكي كان لبس في الحيطه لأنه باع الفيلم في الخارج بسعركويس ومش فارق معاه لاالداخلي ولا البطل.... ده بدايته معاك كلنا عارفينها..!! 

** ميرفت إمام"مدير عام الفضائية المصرية".. لما كل الناس دي تقولك سلامتك ألف سلامة يبقي بناقص اللي ماقالش..!! 
** ياميتين خسارة علي القناة الأولي.. فاضيه.. هايفه.. لالون ولاطعم ولاريحه.. واللي ساترها نشرة الأخبار..!! 
** برنامج"روائع الفن" في الفضائية المصرية..مروي محمود مخرجة واعية.. نهي مروان مذيعة متمكنة.. وطاقم عمل علي أعلي مستوي من المهنية.. نموذج محترم.. برافو. 

** كفاية بقي"ربيع وبيومي"..!!