نورهان الجنيدى

من مبادئ اللغة العربية إننا نعرف نطلع جملة اسمية... وعادة كانت بتبدأ بالصديق...لإن الصداقة هى الشئ الوحيد اللى إحنا بنختاره...محدش بيختار أهله... محدش بيختار إخواته...عشان كده لما بنختار صديق وإختيارنا يطلع غلط...بنتقهر مش عليه قد القهرة على إختيارنا الغلط

فلما سألونى على جملة إسمية... قلت الصديق وفى...أول جملة بتيجى فى بالى...مش من فراغ...ما أنا قضيت معاكِ ليالى...باكل و أشرب وأسرح بخيالى...ده أنا حتى لما أتجوزت...كنتِ أم تانية لعيالى...كان معاكِ كل أسرارى...كنتِ كل حاجة ليا.. قلبى الضعيف و إيدى القوية...كنتِ فاتح للشهية...كان عندك ثلثين العالم من مخزون الحنية...كانوا بيقولوا علينا إخوات...أصلك الوحيدة اللى كان مسموحلى عندك أبات...

هو أنا شبهك ؟!...ولا كانت غيرة بنات؟؟...

حذرونى...حذرونى كتيير...ما تفتحيش بيتك لحد...حرسى على جوزك و ولادك... دى الصاحبة ألد أعدائك...

حد !!!!...بس إزاى ؟!...دى حبيبتى ملاك على الارض...ده أنا لما أزعل...الدنيا كانت تتهد...

هو عادى... طول عمره عادى...طول عمره قاسى وغدار...و حياتى معاه مرار فى مرار

ده أنا كنت خلاص..سمعت كلامك و أخدت القرار...

مش قادرة... مش قادرة أفضل عايشة معاه على قايمة إنتظار... عمرى ما نسيت اللى فات...و كنت خلاص هكلم الولاد...حياتنا معاه بالزق...طول عمرها بالزق...

بس انتِ لا...

أنا كنت جيالك...كنت جاية الاقى حضن...كنت جاية أهرب ليكِ منه...أهرب للحرية من السجن...كنت جاية لإيد تطبطب و تمسح دموع العين... أتارى الإيد طلعت سكين...

متجوزيين!!!!

ليه؟!... ليه انتِ ؟!

ده القلب واحد ما يستحملش طعنتين...

يعنى أنا دلوقتى لو عايزة أبكى...أبكى لمين على مين؟!...على عمرى اللى ضاع مرتين...طيب أجيب تانى غيره منين؟!...

كل ما أشوفك الدنيا فى عنيا بتصغر...و أكره نفسى أكتر وأكتر... إنى عرفت فى مرة شيطان...دخلته و إديته أمان...

ما هو كان قدامك...كان قدامك من زمان...كان عامل نفسه برئ و إنسان...كان هيحبك... ماهوأصلا شبهك...بس أنا عمرى ما كنت ارضالك... عمرى ما كنت ارضى لصاحبة عمرى انها تتخان...

كنتِ قوليلى !!

كنتِ قوليلى و أنا كنت هسيبه...والله هسيبه...الله يهنن كل حبيب بحبيبه...بس الحبيب يقبل بالعيب...

و ده كان ميزته إنى نصيبه...

كنتِ دايما تقوليلى طول ما أنا جنبك إياكِ تشيلى هم...أتاري كلامك كان عسل أسود متغرق سم...و بكره هتيجى... بكرة هتيجى وتبكيلى دموعك دم...

يلا...يلا أدينى ماشية...سايبلكوا الدنيا المؤذية...مثلوا على بعض...مثلى يلا عليه الحنية...و انت كمان مارس هوايتك... زغلل عينها...كالمعتاد بالخاتم و العربية...و بكره هيزهق...أصل الغالى عمره ما يرخص و أنا غالية...والرخيص عمر قيمته ما تبقى غنية...

دلوقتى الجملة الإسمية ... بقت البشر يساووا أذية