عندما تشد القصيدة مشاعر القارئ ويتفاعل مع كل سطر فيها حسب رؤياه وأحاسيسه وذائقته فهل نعتبرها نجاح للشاعر والقصيدة؛ أم حسن تلقى واستمتاع من القارئ؟
 

يقرأ المهندس عصام الجيزاوي "قصيدة النيل" للشاعر عصام مهران متذوقًا ومعلقًا كقارئ يحب الشعر والتعبير المدهش فيقول: 

"النيل فى بلدنا فتوة بقوة حتشبسوت"..
لم أكن أعرف قوة حتشبسوت الا لما شبهتها بالنيل..
الفتوه كل الناس بتهابه وعلشان كده هيفضل النيل اقوى من اعداؤه..
النيل عريس يتزف يوماتي لحضن الارض، تباركه ايزيس..
الله الله فرح بجد عريس وعروسه وزغاريد ومأذون (ايزيس) ومولود، والارض بتحبل وتطلع سبل القمح وسجر التوت. اسرة كامله متكامله من اب وام يباركهم الرب.
ممدود بالشوق من قلب النوبه لحضن الدلتا بالذراعين..
بيجرى النيل من ارض النوبه بكل الشوق الممدود لحبيته الارض فارد دراعينه بيحضن حبيبته قبل ما يفارقها عند البحر ويرجع زى العاده تانى يحضنها بشوق.. قصة حب ابديه لا تنتهى..
مين يقدر يحبس مجرى النيل؟

يابيوت الطين من جد اجدادى
تحت اللبخة ف حر بشنس ولسعة طوبة وهوا أمشير.
طول عمرى كمهندس عندما امر على البيوت الريفيه المبنيه من الطوب اللبن (بكسر الباء) كنت اتعجب ازاى هى عايشه كده ومابتقعش.. صحيح هى ابعادها صغيره لكن المواد المصنوعة منها ضعيفه.. لكن، على رأيك ياخال؛ "طول عمره المصرى بعقل حويط.. مايزبط فى الغيط الا العطلان.. وان ردح الراجل يبقى عبيط"
هو ده المصرى الفلاح اللى اتولد وعاش على ضفاف النيل.. مين بقى يقدر يحبس مجرى النيل؟
النيل البحر النغمة فى صوت كلثوم ونصر الدين.. النيل الدين فى معابد طيبة وصوت عباسط فى التراتيل.. النيل الموجه للطبلاوى وعبده وعوده وربع التون…
النيل البحر.. دائما الناس تقول عليه النيل او البحر.. علشان حساه انه عظيم وكبير زى البحر رغم انه صغير.. قليل لما تلاقى حد يقول عليه نهر..
النيل النغمة فى صوت كلثوم..
ازاى النيل يبقى نغمه.. جماله صانع الابداع.. بيخرج كل اللى جوا البشر من فنون وابداعات.. تلاقى الرسامين قاعدين بيرسموا قدامه او حتى بوحيه.. النيل الموجة للطبلاوى وعبده وعوده وربع التون. حتى ابداعات الملحنين هى من وحى جمال النيل وربع التون اللى اصل الموسيقى العربيه من وحى وابداعات النيل.
النيل الدين فى معابد طيبه..وصوت عباسط فى التراتيل..
طب ايه علاقة النيل بالدين؟. طول عمره المصرى رابط النيل بالدين..لانه النيل مصدر رزقه وعلى ضفافه كان بيزرع ياكل ويعيش.. يبقى النيل بالنسبه له هبة الرب.. بنى كل معابده على ضفافه علشان يعبد ربه..
مين يقدر يحبس مجرى النيل؟
مجنون النيل بشيق جنادل.. يجرى يسافر فى الشرايين.. ويرق فى بحرى على الكورنيش.. مصاحب كل بنات الثانوى.. بحايل فيهم بالمرايات من وشه الصافى.. وبيهديهم كحل العين.. ويبل ضفاير لجلن تطول زى الليل.
من اجمل مقاطع القصيده من وجهة نظرى المتواضعة..
النيل طول عمره بيجرى بسرعة زى المجنون.. بيشق طريقه مابيعرفش عوائق ولا جنادل ولا صخور.. زى الدم مابيجرى حياه فى الشرايين .. طول عمره النيل بيجرى يمد حياه للملايين..
طول عمر النيل بيقعد على ضفافه الحبايب يلاقوا هناك الخصوصيه والجمال ..وكمان البياعين.. كولا وببسي فى حر الصيف.. ودره مشوى وسميط ودقة وبيض لو جعانين..حمص شام فى الشتا يدفوا بعض بيه.. كله على قد الايد والحب قايد قيد..
وكمان عمال النيل يغرى فى البنات.. بنات ثانوى اللى لسه سنه أولى حب..لدرجة انه من صفا وشه بيبقى عامل زى المرايات ..حتى كحل العين من هداياه.. وكله علشان يحلوو فى عين حبايبهم.. وكمان يبلوا بميته ضفايرهم علشان تطول سودا بطول الليل..

النيل فى عويل القطن الراضع جاز قنديل..
ربما تكون هذه الصوره الشعريه غريبه او غير مفهومة بالنسبه لى.. فالعويل معناه الصراخ والبكاء للذئاب والاسود والكلاب .. قد قصد بها الشاعر ان النيل بيشهد جلبة عملية جمع القطن. اما تعبير "الراضع جاز قنديل" فهل المقصود بها ان جمع القطن بيستمر ليل نهار حيث يحتاج الامر وجود قناديل تضاء بالليل، وان هذه القناديل تضاء بالجاز.. قد لا أكون متأكدا!!
اما استخدام الشاعر لكلمة الراضع .. وهى من الرضاعة.. فهى أيضا غريبة.. لان الرضاعة وهى عملية معروفة، فالطفل يرضع لبن امه.. وصغار الحيوانات الثديية ترضع من اثداء أمهاتها، فهل القناديل التى تضئ تشتم رائحة الجاز (أى ترضع الجاز)الموجود فى خزان القناديل فتضيء..
أرجو التوضيح. ويرد الشاعر عصام مهران موضحًا:
عويل القطن شريط من القطن فى لمض الجاز زمان. بيشتعل وبيسحب الجاز من الزجاجة اللى متعلق فيها وينور كانه بيرضع الجاز من الزجاجة... فتيل القطن فى لمضة ١٠ زماااان.. كنا بنذاكر عليه فى بيوتنا القديمة.
يستطرد المهندس عصام الجيزاوى:
يا قصايد حافظ واحمد شوقى وعود مكاوى، السنباطى والابنودى؛ عمنا بيرم ويا جاهين..
يعود الشاعر فى اخر القصيده ليؤكد ان عظام الفنانين المصرين امثال حافظ وشوقي ومكاوى والسنباطي والابنودى وعمنا بيرم وصلاح جاهين هم نتاج هذه الأرض الأم.. أرض النيل .. زوجة النيل العظيم وان عظمتهم قد صنعتها ونحتتها وصقلتها شربهم من ماء النيل.. وعيشهم فى كنف النيل..
فمصر كلها باولادها ورجالها ونساءها هى هبة النيل الاب، وارض النيل الام.
مين بقى يقدر يحبس مجرى النيل؟

نص القصيدة:

النيل 
                                              
النيل فى بلدنا فتوة بقوة حتشبسوت
وصلابة أحمس ..مكر تحتمس 
سيف رمسيس
النيل فى بلدنا عريس
يتزف يومياتى لحضن الأرض تباركه إيزيس
تضحك سواقيه وتزغرت للمولود 
حبلانة الأرض بسبل القمح وسجر التوت
وبياض القطن وخجل الورد كإنه بت بنوت
النيل فى بلدنا روح القٌلة وعشق الزير 
وتقاوى الحَب بقلب أوزير
ممدود بالشوق من قلب النوبة
لحضن الدلتا بالدراعين
محروس بالعين وبالجبروت
يا بيوت الطين من جد أجدادى
تحت اللبخة ف حر بشنس ولسعة طوبة 
وهوا أمشير
مين يقدر يحبس مجرى النيل؟
نوّار الفول وجرون القيضى
وساقية حنا وغيط مهران 
يا عيال القطن ومِجْرِة محسن والقراميط
طول عمره المصرى بعقل حويط 
ما يزيط فى الغيط إلا العطلان
وإن رَدَح الراجل يبقى عبيط 
النيل البحر النغمة فى صوت كلثوم ونصر الدين
النيل الدين فى معابد طيبة 
وصوت عباسط فى التراتيل
النيل الموجة للطبلاوى 
وعبده وعُودُه وربع التون
مجنون النيل بيشق جنادل 
يجرى يسافر فى الشرايين 
ويرْق ف بحرى ع الكورنيش
مصاحب كل بنات الثانوى
يحايل فيهم بالمرايات
من وشه الصافى وبيهديهم كحل العين
ويبل ضفاير لجلن تطول زى الليل
النيل ف عويل القطن الراضع جاز قنديل
كهارب مصر وضى الحارة والفتارين 
يا قصايد حافظ وأحمد شوقى وعود مكاوى
السنباطى والأبنودى ؛ عمنا بيرم ويَّا جاهين 
مين يقدر يحبس مجرى النيل؟