بقلم: تامر راغب
اخدت معايا كهربائي علشان نركب شويه لمبات ونركب النجف
المهم دخل غرفه النوم وطلع علي السلم ولسه بيمد ايده
لقيته بيصرخ وبيقولي خفااااااش .....خفااااااااش يابيه .
ونزل من علي السلم وطالع يجري .
انا : روحت ماسكه وقايله ايه ياعم انت في ايه ؟
الكهربائي : ياهندسه الفتحه اللي في سقف الاوضه دي فيها خفاش كبييير .
انا : ياعم انت ايه الخرف اللي انت بتقوله ده ؟
الكهربائي : طيب تعالي كده ياهندسه وبص .
انا : ببص كده في حذر لقيت فعلا حاجه كبيره كده متكومه في فتحه السقف .
انا : يانهار اسود .
الكهربائي : صدقتني .
انا : ياعم انت اهدي كده
حروح اسأل البواب بتاع العماره .
البواب : ايوه يابيه اصل الشجه كانت فاضيه والشبابيك مفتوحه فأكيد الخفافيش دخلت فيها .
انا : ليه ياعم انت .....هو انت بتتكلم علي ذباب دخل الشقه .....احنا بنكلمك علي خفافيش .
البواب : طب ايه المطلوووب مني دلوقيت .
انا : هاتلي عصايا طويله وتعالي فورا .
البواب : هتعمل ايه بالعصايا ؟
انا : أنت حتخبط بيها الخفاش في الفتحه اللي في السقف دي .
البواب : لا يابيه حد الله
انا مالي ومال الخفافيش
ده بيلبس في وش البني آدم ميطلعشي ولا بالطبل البلدي .
الكهربائي : يانهار اسود بيمسك في الوش يعني ايه
........بعد اذن حضرتك انا ماشي .
انا : اثبت مكانك ياراجل انت
اصبر بس لما يجيب العصايا حنتصرف .
الكهربائي : ياهندسه انا عايز امشي ومش عايز فلوس ربنا يعوض عليا .
انا : اياك تتحرك من هنا
دي جدعنه ولاد البلد
عايز تسيبني وتمشي برضه .
بعد خمس دقايق البواب جاب العصايه .
البواب : اتفضل يابيه العصايه .
انا : اتفضل اعمل بيها ايه
ادخل اضرب بيها الخفاش .
البواب : يابيه جولتلك حد الله .
انا : بصوت جهوري
مش انت بواب العماره دي
لازم تخلصلنا الموضوع ده .
البواب : وانت ساكن العقار
خلص انت عليه .
وراح راميلي العصايه وسبنا انا والكهربائي ومشي .
انا : مديت ايدي بالعصايه للكهربائي .
الكهربائي : ايه ده
انا مش حقدر اعمل حاجه .
انا : عيب عليك وانت راجل كبير كده وواقف خايف من حته خفاش .
الكهربائي : يابشمهندس ابوس ايدك سيبني امشي .
انا : تمشي فين
ياراجل انت عيب كده
احنا ندخل انا وانت الاوضه وانت بالعصايه تزنقه مره واحده في فتحه السقف
حينزل ميت علطول .
الكهربائي : والنبي ياهندسه انا رجلي بتخبط في بعضها .
انا : ياعم ما انا اهو واقف معاك
وانت مش حتمشي من هنا النهارده الا لما تركبلي كل الكشافات وتخلصلي كل شغل الكهرباء .
الكهربائي : ربنا يعدي اليوم ده علي خير .
ودخلته الاوضه بالزق وانا وراه
ووقفت انا علي باب الاوضه
وابتدي يقرب العصايه من الفتحه وهو بيترعش .
وفجأه لقيت الخفاش ده بيطلع من الفتحه
محستشي بنفسي الا وانا بطلع من الاوضه وقفلت الباب ورايا
والكهربائي يصرخ في الاوضه
ويجري في الاوضه زي المجنون وهو بيصرخ .....الحقوووووووني .....ويخبط علي الباب بجنون وهو بيقول افتح يابشمهندس انا في عرضك
وسامع انا صوت رفرفه جناحات الخفاش في الاوضه .
انا : مكلبش في الباب من بره علشان الكهربائي ميعرفشي يفتحه والخفاش يطيح في الشقه ومش حنعرف نمسكه .
صرخت في الكهربائي وانا بقوله
انا : غطي وشك ليلزق في وشك
الكهربائي : بيصرخ وبيجري في الاوضه وهو بيقولي مخبي وشي والله بس افتح الباب الله يرضي عليك .
انا : افتح شباك الاوضه يمكن يطلع منه .
الكهربائي : حااااااااضر .
وسمعته بيفتح الشباك فعلا .
الكهربائي : افتح يابشمهندس الخفاش طلع من الشباك .
انا : استني كده اسمع في صوت للخفاش ولا لأ .
الكهربائي : يا هندسه افتح انا رجلي مش شايلاني .
فتحت الباب في حذر لاشاهد الكهربائي في اسوأ حالاته
كان وشه غرقان ميه
ووشه اصفر وشاحب
وقميصه غرقان
وبيتنفس في صعوبه
واخيرا اترمي يتسند عليا
ولقيته بيقولي " حد يعمل كده " انا كنت حموت .
قعدت اهديه واقوله آدي الرجاله ولا بلاش
لقيته بيبصلي بحسره وهو بيقولي الحمد لله اني جبت عيال قبل الموقف ده .
الصراحه مقدرتش امسك نفسي وانتابتني حاله من الضحك الهيستيري وهو بيبصلي في ذهول .
دمتم بخير
اترك تعليق