أنا متجوز من سنتين تقريبا وعايش في شقة ايجار وبأحاول أمن نفسي أنا ومراتى ونجيب شقة تمليك فى أقرب فرصة.

والدي ووالدتي الاتنين علي المعاش، ومعاشهم ضعيف جدا جدا ومالهومش أي مصدر دخل غير معاشهم وأنا بأساعدهم كل شهر بمبلغ بيساوي تقريبا تلت دخلي عشان مصاريف علاجهم واحتياجاتهم، وليا أخت صغيرة في اخر سنة كلية الصيدلة واتخطبت من شهرين.

كل شهر أول حاجة باعملها هي اني ابعت الفلوس لأهلي، الفلوس دي مهمة جدا ليهم لانهم بيصرفوا منها علي العلاج اللي بيحتاجوه "سكر- ضغط ومصاريف دراسة اختي" وبأعمل ده طبعا بنفس راضية جدا ونفسي أزود لهم الفلوس دي، وقايل لمراتي من قبل ما أتزوجها اني باساعد أهلي من مرتبي كل شهر.

المهم من فترة مراتي ظهر عليها انها متضايقة من الفلوس اللي باساعد بيها أهلي، وده حصل لما كنا مزنوقين شوية ومع ذلك مافكرتش اني أخر علي أهلي الفلوس أو اقللها. ولما مراتي وضحت انها متضايقة قولت لها بالنص اللي مالوش خير في أهله مالوش خير في حد. وقولت لها اني لو اخرت الفلوس علي أهلي أو مابعتهاش أو قللتها انتي لازم تخافي مني وأنا مش هاعمل كده.. ردت عليا وقالت لي انا كمان اهلك واحنا مزنوقين، ومافكرتش في كلامها نهائي وبعت الفلوس لأهلي رغم زنقتي.

المهم بالنسبة لي واللي أنا محتاج رأيكم فيه.. أنا ان شاء الله هايدخل لي قريب مبلغ مش بطال ممكن يبقي مقدم شقة تمليك كويسة، لكن في نفس الوقت أختي محتاجة تتجهز عشان جوازها وأنا اللي مسئول أجهزها لأن والدي طبعا مش هايقدر.. ومراتي غالبا مش هاتقبل ده وهايهمها احتياجنا لشقة وأننا نأمن نفسنا من الإيجار ونملك شقة.

أنا بكل نفس راضية واخد قراري اني أجهز اختي واجوزها مهما كانت العواقب.. اختي مخطوبة لولد محترم وابن حلال جدا والجواز مش هايستني لكن الشقة ممكن تستني ونقدر نوفر فلوسها كمان سنة او اتنين بالكتير، لكن أكيد جواز اختي مش هايستني ده كله.

هل أنا غلط؟ هل مراتي من حقها تتضايق اني باساعد أهلي؟ هل من حقها تقدم ضرورة اننا نملك شقة علي جواز اختي؟ هل ابقي ظلمت مراتي لو عملت كده؟ ولو عملت العكس ووفرت الفلوس لشقة تمليك، هابقي ظلمت اختي اللي تقريبا مسئولة مني؟.

محتاج رأيكم.. واعمل ايه لو حصل مشكلة بيني وبين مراتي بسبب قراري ده؟

** بر العائلة الاهتمام بالأهل رضا الوالدين صلة الرحم كل دي أدوات جلب الرزق ووجود البركة الأهل تعبوا وربوا واقتطعوا من قوت يومهم لاطعام أبنائهم وتربيتهم ورسم مستقبلهم الأهل بمجهودهم وتربيتهم ومساعدتهم ورضاهم هم رأس المال الفعلي الذي يدر الدخل علي الابناء ويجلب لهم الرزق لابد وان نرسخ هنا ان صحيح الدين وصحيح الأخلاق وصحيح القيم يؤكد علي ان مفهوم رعاية الوالدين واشباع متطلباتهم الأساسية وكسب رضاهم هي أدوات الحماية الحقيقية والأمان للزوجات، والازواج وان رصيد الستر والرضا والامان الذي يحقق للاسرة استقرارها وللازواج أمانهم ويمثل للأولاد القدوة الحسنة والنموذج السوي للسلوك الذي يرسم لهم طريق بر الوالدين ويجعلهم قادرون علي تقدير الواجب وتحمل المسئولية تجاه الاب والام وان الأنانية هنا سيعاني منها الزوج والزوجة معا من غضب الوالدين وبالتالي عدم رضا الرحمن مع مثل ونموذج سييء لابنائهم في علاقاتهم المستقبلية معهم والقضاء علي البركة او الرضا او الأمان.

لذا بروا آبائكم تسعدوا صلوا ارحامكم تطمنوا ضحوا من أجلهم كي تسنوا لابنائكم السنن الحسنة لتجنوا ثمار ما فعلتم  ردوا الجميل استمتعوا بعطاء الأهل ليغدقوا عليكم بالدعوات والمحبة والرضا.

ولكاتب الرسالة أحييك علي التزامك تجاه والديك واستمر في ارضاء ربك فهو الجالب للرزق والمانح للبركة والمحقق لكل أسباب السعادة زوج أختك أولا فهذا هو مصدر أمانك في ستر أهلك ودعم رصيدك من الخير الذي سوف يرده ربك لأولادك ويرزقك أضعافا مضاعفة تحدث مع زوجتك تفاهم معها حقق رضاها بذكاء وحنكة واجعل لنفسك مساحة من الخصوصية مع والديك كي لا تعكر صفو زوجتك وحدد ثوابت الحياة في علاقتك بأهلك سواء اهل بيتك من الزوجة والأبناء أو والديك واخوتك دون ظلم او عدم توازن وازن بينهم بما يرضي الله بمحبة وذكاء ومودة ورحمة واستعن بالله وحسن النوايا واسمحلي ان اقول لزوجتك ان الأمان ليس في وجود شقة تمليك او أموال في البنوك او رفاهية أموال الأمان اولا في رضا الرحمن والالتزام بصحيح الإيمان وادرك تماما انك كذلك حيث بعث لكي الرحمن ذلك الزوج الحنون البار بأهله الساتر لاخته الواصل لرحمة نعمه، اشكري ربك عليها وتأكدي أن هذا هو أمانك الحقيقي وسوف يرزقك الرحمن برضا ودعوات هؤلاء الأهل وذلك الزوج بما يحقق لكي أمنية الشقة ان شاء الله أسعدكم الله جميعا.