رئيس مجلس الإدارة
طارق لطفى
رئيس التحرير
أحمد سليمان
محمد فهيم: سعيد بمشاركتي في "عملة نادرة" وماندو العدل رشحتني
قال الفنان محمد فهيم إنه تم ترشيحه لدور علاء عبدالجبار بمسلسل "عملة نادرة" جاء من خلال الأستاذ ماندو العدل والحقيقة انني كلمته بعد مسلسل "فاتن حربي" وقلت له أنا عاوز أشتغل معاك لأنك مخرج كبير وبتظهر كل الممثلين اللي بيشتغلوا معاك.
وأضاف انا بحب أذاكر علم نفس ولما قرأت شخصية علاء عبدالجبار لقيت تناقضات كتير في الشخصية موجودة في كل واحد فينا، ودي أكثر حاجة حبيتها في الشخصية، وكان لازم يظهر علي وجهه أنه مش راضي عن الأخطاء اللي بيعملها، علشان الناس تتعاطف معاه ولازم يبقي في نبرة صوت طيبة.
وتابع أن أستاذه العظيم الفنان محمود مرسي اتعلمت منه أنه كان لما يعمل مشهد ما يروحش يشوفه في المونتر لكن يسمع صوته فقط لو عجبه يبقي خلاص تمام المشهد وأنا بعمل كده.
وتابع أن العدل جروب اشتغلوا بأصول المهنة وكان في تدريبات ترابيزة لمدة شهر والاستاذ ماندو بيقعد مع كل ممثل لوحده ودور الصعيدي مش جديد عليا أنا عملته قبل مدة في مسلسل "الكبير أوي".
أضاف: أنا كنت بسمع أغاني صعيدية في الغرفة قبل التصوير وبسمع مربعات الشيخ التوني علي طول، وكل تفصيلة في الملابس والأداء كنا متفقين فيها مع الأستاذ ماندو العدل.
وعن أصعب مشهد في المسلسل كان لما بعرف أن مراتي بتخوني وضربتها. وأنا عمري ما مديت ايدي علي واحدة ست خالص.
أشار محمد فهيم أنا سعيد بالعمل مع الأستاذ جمال سليمان، وهو شخص مثقف جداً، وكنت باخد رأيه في تفاصيل المشاهد، وكنت بستمتع بالتمثيل أمامه وبتعلم منه.
وأضاف أن العدل جروب قامت بتأجير مكان وعملوا فيه ديكور النجع كله، وأنا بشكرهم علي حرصهم على التفاصيل الإنتاجية.
وعن دوره في مسلسل إسماعيل ياسين وسيد قطب في مسلسل "الجماعة" قال فهيم إنه علامتان بارزتان في مشواره الفني، وربنا كرمني بشخصيات مهمة في الدراما.
اترك تعليق