فنانة شابة ابنة شقيقة النجمة إلهام شاهين تخطو بخطي ثابتة فى مجال الفن تسعي لاثبات موهبتها الفنية بكل دور تشارك فيه وتبحث عن التنوع فى الأدوار حتى يكون الجمهور على يقين بتمكنها من أدواتها كممثلة، شاركت فى مسلسل "ضد الكسر" بدور فرح وبحكاية "زي القمر" ومسلسل "خارج السيطرة" كما شاركت فى مسلسلات "منورة بأهلها ومين قال ووسط البلد" الذي جسدت فيه دور ريم وحقق نجاحًا ملحوظًا، إنها إلهام صفي الدين التى خاضت إلهام تجربة جديدة حيث شاركت فى فيلم "صاحبتي" مع المخرجة كوثر يونس الذي شارك فى مهرجان فينيسيا كما حصد جائزة لجنة التحكيم الخاصة بالمسابقة الرسمية للأفلام الروائية القصيرة بمهرجان القاهرة السينمائي الدولي بدورته الـ44 برئاسة حسين فهمي، التقت "الجمهورية أونلاين" بها لتكشف ردود الأفعال بعد الفوز وكواليس التصوير وردها على المشهد المثير للجدل بالفيلم.. وإلي نص الحوار..

فخورة بحصد "صاحبتي" جائزة من مهرجان القاهرة السينمائي

التحضيرات استمرت 6 أشهر.. ومشهد القُبلة كان مهمًا فى سياق الفيلم

الجرأة فعل وفكر.. وأنا أحب جراءتي وراضية عن نفسي

شخصية سارة متمردة.. وسعيدة بالتعاون مع مارك حجار

صورنا يومين فقط.. والأجواء فى اللوكيشن كانت رائعة

سعيدة بالتعاون مع المخرجة كوثر يونس.. وماعنديش قدوة فى الفن

لا أبحث عن الجدل والتريند.. ونفسي أعمل دور كوميدي

إلهام شاهين منحتني الثقة بعد مشاهدتها الفيلم.. ورد فعل عائلتي جعلني قوية

سأجسد الدور الجرئ على حسب رسالته وهدفه

إلهام شاهين أمي الثانية.. وأحب فيلمها "خلطة فوزية"

خالتي إلهام بتنصحني دائمًا أختار صح.. وجمله "لولو مهمة" مبتفارقنيش

جرأة إلهام شاهين فى رحلتها كانت مسيرتها الخاصة.. ومش عايزه مشواري يتقارن بحد

"وسط البلد" علمني الصبر وتجربة مميزة.. وانتظروني فى الجزء الثاني

حدثيني عن ردود الأفعال بعد فوز "صاحبتي" بجائزة لجنة التحكيم الخاصة بالمسابقة الرسمية للأفلام الروائية القصيرة بمهرجان القاهرة؟

سعيدة وفخورة بفوز الفيلم بجائزة من مهرجان بلدي مصر وردود الأفعال كانت رائعة الناس وعيلتي وأصحابي منحوني دعم كبير جدًا وأنا أتقبل كل الأراء ومبسوطة جدًا بالفيلم.

هل مشاركة "صاحبتي" فى مهرجان فينسيا كان بوابة لعرضه فى القاهرة السينمائي؟

صاحبتي كان أول فيلم مصري قصير يدخل المسابقة الرسمية ومشاركة فيلمي المصري فى مهرجان كبير مثل القاهرة ليها طعم خاص عندي.

كيف استقبلتي الهجوم على مشهد القبلة فى الفيلم؟

عمري ما رديت على الهجوم وبما اني مقتنعه باللي بعمله يبقي انا مبسوطة.

هل كان مشهد القبلة مهم فى السياق أم لا؟

اتكلمت مع كوثر على المشهد واتكلمنا على كل التفاصيل كثير وقعدنا 6 شهور تحضيرات وكوثر كانت متقبله اوي اننا ندي وجهه نظرنا انا ومارك حجار بطل العمل وذلك حسسني بُحرية اني اقول اللي عايزه اقوله وفكرة المشهد اللي مش عاجب الناس هو كان مهم فى السياق الدرامي للفيلم وفي حاجات بتوصل الحالة وهي هتوصل لكل فيلم بطريقة مختلفة وبالنسبه ليّ هي حاجه مختلفه.

هل الجرأة فعل أم فكر؟

الجرأة فعل وفكر هي بتيجي من كل حاجه جوانا بحس ان اي حاجه فى الدنيا لو انت مقتنع بيها بتتعمل بقلب وعقل وبالنسبه ليّ أنا بحب جرائتي اوي وراضية عن كل اللي انا عملته.

كم استغرقت تحضيرات الفيلم؟

مكثنا أكثر من 6 شهور بنحضر وقت التصوير وكان هناك راحة ومبسوطة ان مارك حجار بيمثل معايا وهو شخص بروفيشنال وممثل ممتاز وبيعرف يفرق بين الحياه والشغل وشخصية سارة متمردة وهي اهدي مني وانا "مشعننه" أكثر منها وحبيتها وعيشت معاها.

كيف كانت أجواء التصوير فى اللوكيشن؟

الأجواء كانت جيدة وكان هناك راحة غريبه التصوير كان يومين وعدوا بسلاسة لاننا كنا حفظنا كل حاجه عايزين نعملها.

كواليس تعاونك مع المخرجة كوثر يونس؟

مبسوطة بالتعاون معها لأنها طلعت مني حاجات مكنتش حاسه انها ممكن تطلع مني بدري اوي كده.

هل إلهام شاهين قدوتك فى الفن؟

مش حاسه ان عندي حد قدوتي فى الفن وبحب اتفرج على الأفلام فى كل أنحاء العالم بتفرج على الأسباني والمصري وعديد من الأعمال وبحب الحاجات اللي بتمسني.

هل إلهام صفي الدين تحب الجدل والإثارة من أجل التريند؟

نيه البشر بتبقي باينه اوي فى عنيهم وتصرفاتهم وده مش الهدف بتاعي والهدف من اي حاجه بعملها فى حياتي اني ابقي بحسس الناس ونفسي أعمل كوميدي جدًا وكل عمل بيطلب من الممثل انه يفتح حته جوه نفسه مختلفه.

كيف كان رد فعل إلهام شاهين بعد مشاهدتها الفيلم؟

إلهام شاهين شافت الفيلم زي الجمهور ومنحتني دعم كبير ودعمها ده أعطاني ثقة اني اتخطي اي حاجه وانا مفرقش معايا الهجوم اوي لاني مقتنعه اوي باللي بعمله، وأكثر شئ فرق معايا رد فعل عيلتي وانهم حبوا الفيلم وكانوا في ضهري.

هل المشاهد الجريئة محطة وستنتهي أم ستقبلين تجسيدها الفترة المقبلة؟

سأجسدها علي حسب العمل وبيوصل اي وليه موجود فيه تلك المشاهد وحسب رسالة العمل أيضًا.

ماذا عن منافسة الفيلم فى مسابقة الأفلام القصيرة؟

حبيت وجود تنافس بين الأفلام لأن ذلك يوضح أن هناك منافسة وفن مختلف وشوفت حاجات كثير مختلفه وانا مبسوطه ان الفيلم شارك فى المهرجان.

إلهام شاهين مسيرة فنية كبيرة.. ما العمل الذي تحبين مشاهدته لها فى أفلامها؟

بحب ليها أعمال كثيرة وشهادتي مجروحة فيها وهي أمي الثانيه وأنا شايفاها أحلي حاجه فى الدنيا وبحب فيلم "خلطة فوزية" جدًا.

هل تعرضتي للانتقاد لاختلاف قناعات الجمهور أم لمجرد الانتقاد فقط؟

هناك ناس بتنتقد لمجرد الانتقاد وهناك آخرين قناعتهم في الحياه مختلفه وبالنسبه ليّ دي حياتي ومسيرتي الفنيه وكل حد ليه وجهه نظر.

هل يعتبر فيلم صاحبتي شهادة ميلادك فى الفن؟

فيلم صاحبتي بيكتب شهادة ميلاد ليا لانه اول حاجه اعملها فى الحياه ودي اول حاجه اعملها وتعمل كل الضجة دي بشكر ربنا وبقول الحمد لله.

ما تعليق إلهام شاهين بعدما حصلتي علي رأيها فى مشاركتك بالفيلم؟

وقاتللي لو انتي مقتنعه تعملي الفيلم اعمليه وكل الحاجات اللي عملتها مخدتش رأيها فيهم غير الفيلم ودور تاني.

ما النصيحة التي توجها لكي باستمرار؟

بالتمثيل بتقولي اختاري صح وتكوني مصدقاها ومقتنعه بيها أما فى الحياه بتقولي "خلي بالك من نفسك لولو مهمة" والجملة دي بتكون فى بالي دايما وهي قصدها مهمة فى الحياه ووجودها مهم.

بعض الجمهور على السوشيال ميديا أطلقوا عليكي انك جريئة زي خالتك ايه ردك؟

هناك أدوار بتحتاج جرأة وأخري تحتاج انك تكون مكسور وهناك أدوار أيضًا تحتاج انك تتضايق من جواك بجد وفيه ادوار بتطلع من جوانا حاجات كثير اوي ومن ناحية الجرأة الهام شاهين مرت بيها فى رحلتها انا حاسه ان دي كانت مسيرتها هي الفنيه وان انا مسيرتي الفنيه هتبقي بتاعتي انا وعارفه ان الناس دايمًا هتقارن وفخورة بيها جدًا كفنانة وكخالتي وامي بس انا عايزه ان مسيرتي الفنيه تبقي بتاعتي ومتقارنش بمسيره حد.

تقييمك لتجربة مسلسل وسط البلد؟

علمني الصبر بقالنا سنه بنصور و192 حلقة نفس اللوكيشن والناس والروتين نفس المشاهد وكان معانا كذا مخرج فى العمل وممثلين كثير وده علمني كثير عن نفسي كممثلة وتجربة مميزة.

أحدث أعمالك؟

أحضر للجزء الثاني من مسلسل "وسط البلد" وانطلاق التصوير الشهر القادم ومكملة فى تجربتي مع ريم.