بشري سعيدة بدور الأم في "معالي ماما"

قالت النجمة بشري أنها سعيدة بدور الأم في فيلم "معالي ماما" رغم أن معظم بنات جيلها من الممثلات يرفضن هذا الدور بحجة لسه بدري علينا.

تقول بشري: الفيلم أعجبني لانه خلطة من الكوميديا الخفيفة وشخصية معالي لها أمثلة كثيرة في المجتمع وهي السيدة التي تعمل في منصب مهم وفي نفس الوقت حريصة علي رعاية أولادها. ورغم أن أولادي في الفيلم أكبر بكثير من أطفالي لكني أحببت التجربة لأني بحب أكون مختلفة في كل دور.. ولو فاكرين دوري في مسلسل عوالم خفية كنت أماً للممثل الشاب خالد نور رغم أن فارق السن بيننا قليل.

عن الصعوبات اثناء تصوير "معالي ماما" تقول النجمة بشري: كنا خايفين كلنا لأننا بنصور في عز وباء الكورونا وفعلا اصيبت بالفيروس لكن الحمد لله تعافيت بسرعة.. وكمان وجود اطفال في الشغل صعوبة تانية لان التحكم في الأطفال صعب لكن المخرج احمد نور عنده خبرة كبيرة في التعامل معهم والسيطرة عليهم في اللوكشن.. يعني هوا اتحمل شقاوتهم واحنا استفدنا بادائهم التلقائي أمام الكاميرا.

فيلم "معالي ماما" تأليف نادر صلاح الدين ويشارك في بطولته سامي مغاوري ونور قدري ومحمود الليثي ونور ايهاب والاطفال ياسين وسولي.

عن التواجد في رمضان تقول: لو اتعرض عليا دور حلو في مسلسل 10 حلقات أو حتي 15 معنديش مشكلة. إنما اكتر من كده صعب جداً لأن رمضان بإذن الله علي الأبواب وواضح أن أغلب مسلسلات الـ 30 حلقة صناعها ضاغطين علي نفسهم أوي في الشغل وربنا يوفق الجميع.