قوية
كلمات: ياسمين حافظ
قوية زي ما الكتاب بيقول
ومش بيبان عليها ع طول
ومستحيل تصدق
إنها دايما شيالة حمول
قوية حتى في رقتها
وبنظراتها وخفة قعدتها
قوية بابتسامتها
وشقاوة طفولتها
قوية لكن عمرها مابتقول
قوية في حبها الشديد
وجواها إرادة وعزيمة حديد
لا عمرها اهتزت
ولا سابت نفسها ووقعت
وحتى لو انصدمت
تعيد إرادتها من أول وجديد
قوية في الوداع
لكل اللي خان وباع
تفارق من سكات
وتنسى في ثانية اللي فات
وتشوفها بعد الصدمات
حلوة زي النجمات
والحلو فيها يزيد
راضية وقابلة
في كل الحالات
وتلاقيها بتضحك
في عز الأزمات
لا عمرها شيلت حد همومها
ولا طلبت حاجات
قوية في رحمتها
وكمان في قسوتها
وكمان في البعاد
ممكن تلاقيها فجأة مشيت
من غير معاد
وده بيكون أكيد
بعد كتير تراكمات
صبورة وحمولة
وبتدي من غير حسابات
ولما تحس بخيانة اخلاصها
بتقلب من غير مقدمات
ولما تحس باستغلالها
بتقفل بابها من سكات
قوية من غير ماتتباهى
وتقول أنا اقوى البنات
لما تحب تبين قوتها
الكل بيشوفها في التصرفات
قوية وهتفضل قوية
رغم كل السخافات
والناس والأزمات
