"طه" يعمل علي عربية فول "بالسيدة" بـ 50 جنيهًا في اليوم
محررة الجمهورية اونلاين ترصد عمالة الأطفال
خلال رصد حالات لأطفال يعملون في سن مبكرة علي أرض الواقع تقابلنا مع "طه محمد عطا" 14 سنة هو في الأصل من المنيا ولكنه أتي إلي القاهرة في منطقة السيدة زينب. للعمل مع خاله علي "عربية الفول".
قال أنا بشتغل مع خالي بصحي كل يوم الصبح بدري واخرج معاه نلف بالفول في الشوارع بمنطقة السيدة زينب وأنا بمسك الجرس أحركه رايح جاي عشان الناس تسمع وتبص من البالكونات واللي يطلب يشتري خالي يجهز كيس الفول وأنا أطلع أوصله للشقق أو أحطه في "السّبت". باخد 50 جنيهًا من خالي في اليوم. وتلعب بالليل شوية بعد الشغل وأنام عشان أقوم الصبح نشوف أكل عيشنا أبويا موجود بس فاتح سوبر ماركت في المنيا وعندي أخ وأخت وأنا الكبير ولما الدراسة تبدأ بروح البلد.
وأما "محمد محمود" صاحب الـ 13 عاما الذي بالكاد تلمس قدماه محركي الفرامل والبنزين يعمل علي سيارة السرفيس. بخط الهرم جيزة.
قال أنا اشتغلت سواق علي العربية لما أبويا علمني السواقة. واتعلمت في أسبوعين بشتغل من الساعة 2 الضهر لـ 10 أو 12 بالليل. وبتغدي وأنا علي الخط وسايق. وعند سؤاله عن مواعيد راحته وأوقات اللعب عنده فقال. باخد اجازة يوم الجمعة بس بقضيها في البيت مش بخرج والعب اللعب ده للعيال الصغيرة؟ ولكن أنا لازم اشتغل وأكل عيش عشان ممدش أيدي وأخد مصروفي من أمي.
وأما "مازن عماد" 12 سنة في الصف الرابع الابتدائي ويبدو انه رسب في احدي السنوات الدراسية تقابلنا معه في منطقة الدرب الأحمر. وهو يقف داخل مخبز. فقال أنا من الفيوم. مبسوط عشان شغال مع بابا أنا بصحي بدري وبنزل علي الفرن في حاجات معينة بعملها زي اني باخد العيش من علي القفص بعد ما يطلع من لفرن وأهويه ولما يجي الزبون باخد منه الفلوس وأعد له العيش وأحطة في شنطة واديهولة ومبسوط بالشغل مع أبويا ولو غير أبويا مكنتش هشتغل
