حلا شيحة المذبذبة بين الفن والزواج والالتزام .. القصة كاملة

سادت حالة من الاستياء والرفض والهجوم من الجمهور والفنانين على منشور حلا، التي أعلنت فيه توبتها عن المشاهد الرومانسية، واتهمت الوسط الفني بأن "فتنة الشهرة" اعمت أعينهم.

قالت شيحة في منشورها:"أنا اتفاجئت جداً بنزول كليب يجمع فيه مشاهد متفرقة من الفيلم وخصوصاً بعد آخر بوست نزلته ووضحت فيه أنا إيه واتفاجئت أكتر خصوصاً بعد وعد تامر حسني ليا وتأكيده إنه سیحترم رغبتي وبعض الطلبات التي طلبتها منه بكل احترام وود الصيف اللي فات وأکد لي أنه سيحترم رغبتي".

اضافت: "إحنا يمكن نجحنا بمقاييس الدنيا بس صدقوني بمقایيس ربنا إحنا لم ولن ننجح.. أنا عارفة ومتأكدة إن زملائي جواهم خير بس للأسف فتنة الشهرة والنجاح مش بتخلينا نشوف ونقيس الأمور صح".

تابعت: "بتكلم من قلبي الكليب ده ميرضيش ربنا وأنا عيطت لأني شفت نفسي في المشاهد دي.. دي كانت ذلة نتيجة ظروف مريت بيها وكلنا بنغلط ولازم نغلط علشان إحنا بشر، بس المصيبة إننا بنغفل وبننسی".

وأردفت: "أنا مش هتكسف من حد، أنا تبت من المشاهد دي وهي لا تصح وأنا غلطت وبصلح وأهم حاجة ربنا يرضى عني لأن في الآخر ده اللي هينفعنا مش الشهرة ولا النجاح اللي هو مش نجاح أصلا علشان النجاح الحقيقي حاجة تانية خالص، إحنا أغلبنا ناسينها إلا القليلين منا".

واستطردت حلا: "الفن لو بيخلينا نبعد عن منهج ربنا ومنبقاش قدوة لولادنا يبقى باطل وميبقاش فن.. إحنا كلنا عندنا امتحان في الدنيا دي وحابة أفكرك بالفيديو ده یا تامر اللي قولت فيه أنا مش بتمنى أموت وأنا مطرب، أنا دايما خايف کده.. كلام أكيد قولته في لحظة صدق جواك وجوانا كلنا، شوفه تاني يمكن يفكرك إن جواك أكيد فيه صراع".

واختتمت : "أنا وكلنا بنغلط بس المهم في الآخر نتدارك الغلط ونصلح (إلا من تاب وآمن وعمل عملاً صالحاً فأولئك يبدل الله سيئاتهم حسنات وكان الله غفوراً رحيماً).. الله على كلام الله وجماله يا سلام لو أصواتنا ومواهبنا كلها نستعملها في الخير عشان يبقى فن بجد".

في المقابل جاء رد تامر حسني أيضا عبر صفحته الرسمية، حيث أكدت انه كان يتمنى ان تتواصل معه تليفونيا، بدلا من النقاش والحديث على الملأ ومشاركة الجمهور بهذه المشكلات، لذلك رد عليها عبر السوشيال ميديا، مثلما فعلت.

قال تامر :" أولاً أنا عمري ما وعدتك إن الكليب مش هينزل دا محصلش اصلاً يا حلا مش أنا خالص اللي أوعد و أخلف….. الحقيقه اني إحترمت كلامي معاكي و وعدتك أشيل مشاهد تانيه طلبتيها و شيلتها بالفعل و شكرتيني عليها و لو حابه تفتكري المشاهد اللي اتشالت بعد اذنك روحي شوفيها في المونتاچ عند الأستاذ عمرو عاكف او كلميه يبعتهالك كلها موجوده ، و بعدين الفيلم بقاله ٣ اسابيع في السينمات و الكليب موجود جوه الفيلم ".

اضاف:" هو بالنسبالك الحرام إننا ننزل الكليب على اليوتيوب بس !! إنما الكليب يتشاف جوه السينمات عادي ؟؟؟؟ منطق غريب فعلاً يا حلا ، و بعدين هو مش أنتي اللي مضيتي عقد و تقاضيتي عليه مبلغ كبير عشان الدور دا بعينه !!!!! هو مش إنتي اللي صورتيه و مثلتيه بنفسك و بمنتهى الرضا ولاّ حد أجبرك ؟.

استكمل :"للتوضيح للجمهور الكريم أنا و المخرجه الأستاذه ساره وفيق بعتنالك و كنا بنتحايل عليكي تيجي تشوفي شغلك قبل إصدار الفيلم عشان لو عندك أي ملحوظه تقوليها ، ماكنتيش بتردي علينا و تليفوناتك كلها كانت بتقفل في وشنا".

تابع :"إنتي للأسف يا حلا متعاملتيش صح مع الموقف، كان لازم تهتمي بأمرك أكتر من كدا، و لو كان ليكي أي طلب تاني كنت هعمله بكل حب، إنما إنتي فجأه أختفيتي و مكملتيش تركيب صوتك في الفيلم، ولا جيتي تتصوري عشان آفيش الفيلم أصلًا، و مخليتيناش نعرف نعمل آفيش مجمع !!!، و بقيتي تقفلي تليفوناتك و تكنسلي علينا كلنا، و بعدين أي فيلم بيبقى ليه خطه مسبقه في الدعاوية، و انتي عارفاها كويس و وافقتي عليها، و دا كليب رومانسي يعني معقول كنتي عايزه المنتج يشيل كل مشاهدك اللي صورتيها من الكليب و يطلعني بغني و بقول الكلام الرومانسي دا للأستاذ ماجد الكدواني مثلاً هو دا يُعقل ؟؟.

اختتم:"أنا زعلان منك جداً يا حلا على مفردات البوست بتاعك الغير موفقه و مستحيل هرد بطريقتك اللي فيها تجريح و اتهامات باطله ليا إحتراماً لحجات كتير يمكن فايتاكي بس مش هتفوتني و على فكره انا واثق انك عارفه اني مستاهلش منك كدا و هكتفي بالتوضيح دا و ربنا يهدي الجميع و يكتبلك كل الخير اللهم آمين".

بعد ساعات من نشر حلا البوست قامت بإغلاق خاصية التعليقات، نظرا لعرضها للهجوم الكبير من الجمهور الذي علق لها قائلا :" البنت دي محتاجة مساعدة من دكتور نفسي، مضطربة و متذبذبة كل شوية بحال ربنا يهدي"،" مفيش حد ضربها علي إيديها كان فين ضميرها و عقلها إشتغلت و قبضت فلوس" :" يعني انتي معتقداتك وقوة ايمانك متوقفه ع وجود الرجل ف حياتك، خلاص ابعدي م غير ماتهرتلي ودعي الخلق للخالق عشان كلامك خلاص مابقاش له مصداقيه"، المشكلة اذا طلقها مسعود من الصبح هترجع للفن علشان تعود للاضواء"، ياريت بس لما تطلقي ماترجعيش تقولي عايزة أمثل تاني يا أستاذة"، بصراحة تفكيرها غريب جدا وطالما انتي مستحرمة المشاهد اللي انتي عملاها عملتيها ليه وماستحرمتيش ليه انك تقلعي النقاب وتتبرجي وترجعي تاني للتمثيل بصراحة قمة التناقض ربنا يهدي" .. غيرها.

بينما اشادوا برد تامر حسني، وقالوا :" رد محترم جدا من فنان محترم "،"بصراحة انسان مهذب وكلامة كلة منطقي هي متخذة الحجاب لعبة يومية نازعته لابستة وخابصة الناس وياها"،" كلام تامر عقلاني وصح وانت باشا بجد.. حلا الدين مش سبوبة محدش اجبرك تصوري المشاهد على رأي تيمو "،" يا ريت بعد ما تطلق ما حدش يشغلها تاني "،" انسانة متناقضة قراراتها مرتطبة ب زواجها وعديمة شخصية تحلل و تحرم علي مزاجها"... وغيرها.

كما قام عدد كبير من الجمهور بعمل كوميسات ضاحكة وساخرة من مواقف حلا، بالإضافة لعدد من الفيديوهات، التي ظهر فيها ماجد الكدواني وكأنه في مشاهد رومانسية مع تامر حسني.

كما تداولت تصريحات لوالد حلا، الفنان التشكيلي أحمد شيحة، والذي أكد على انزعاجه من كلامها، وأنها لم تتحدث معه بشأن ما نشرته، مشيرا أنه متفاجىء بعد الذي كتبته، وأنها ليس لها حق أن تقوم بإدخال الدين في الفن وإن كانت ترى المشاهد بها أشياء خارجة كان يجب أن تعترض عليها أثناء التصوير ولكني كفنان لم أجد أن الفيلم يوجد به مشاهد خارجة وجميعها في السياق الدرامي ولم تؤذي أحد.

ووتدخل عدد من الفنانين رافضين اسلوب حلا، حيث علقت الفنانة راندا البحيري :" هو محدش قال ل حلا إن باب التوبه مش موجود عالإنستجرام؟، مضيفة:"هو اللي بتعمله ده ملهوش عندي غير معني واحد علي فكره و معني شرير انها بتحاول تشتغل ضد فيلم تامر، و اظن اظن ان الشخص المتدين مبيفكرش بالشكل الشرير ده خالص، واستكملت :"بتقولك بمقاييس ربنا لم و ((لن)) ننجح، هو حد معلمها عربي كويس ؟؟.

المنتج محمد العدل:"اللى عملتيه شايفاه حرام، هتصرفى فلوس حرام؟؟؟؟.. رجعى الفلوس.