قصيده بعنوان ( مصر بتحب السلام ) إهداء الي جيش مصر العظيم قادة وضباط وجنود
للشاعر جمال اليمنى- قنا
مصر بتحب السلام
مصر ماتحبش قسيه
إحنا فعل مش كلام
رجعوا التاريخ شويه
أمننا سرب الحمام
قالوا ام الدنيا ديه
لكن لو هتقول يا حرب
هتلاقيها حاجه تانيه
جاهز أنا رهن الإشاره
و في إيدي درع و بندقيه
مصر بتحب السلام
مصر ماتحبش قسيه
شوف من أول عهد مينا
جيش قوي دايماً حامينا
عمره ما كان أبداً صدامي
هدفه بس إللي يعادينا
مصر يا إبني مش هفيه
في الحضاره الأصل هيه
و هيه دايما العفيه
و البهيه و القويه
مصر بتحب السلام
مصر ماتحبش قسيه
يا إللي ناوي الشر فينا
هتلاقينا
إحنا ميت مليون مقاتل
على السفينه وألف مينا
عمرنا ما نثور لباطل
أو هنقبل ب الأذيه
مصر بتحب السلام
مصر ماتحبش قسيه
قالها رب الخلق فينا
إدخلوها بسلام
إدخلوها آمنين
هيه أم الدنيا هيه
تبقى للعالم هديه
مصر بتحب السلام
مصر ماتحبش قسيه
ياما على الراس دقت طبول
و للجمال رقت خيول
هما فين هما فين
التتار وللا المغول
مصر بتحب السلام
مصر ماتحبش قسيه
