صك الحلم

شعر: اسماء كامل

مش عايزة اعيش زي الملاك
ولا رافعة راياتكم البيضـة
ولا عايزة ابص في عنيكم
ألاقي الصورة مظبوطة
أنا بشر..
مخلوق فيها عشان اسعىٰ
عشان احلَم
واشوف براح الحلم لفين يوصلني
صحيح يمكن أكون لاسعة؟!
لكن من أجل أحلامي..
وايه يعني!

ما كتير عايش ولابس توب الملايكة
بيناجوا الحلم وسر القلب متخفّي
عايشين حياه محرومة من الضحكة
في صورة إبن أصول ومتصفّي

ماتيجوا ف مرة تحكولي، وصلتوا لإيه؟!
وتوب برائتكوا اللّي مش طاهر، وصمكوا بإيه؟!
وليه؟!
ليه اعيش دور البريء وانا الجاني؟!
ليه اكمِّل والعُمر منّي بيعاني؟!
يا أناني!!
عايش دنيا مربوطة بقيد تقاليد
كل اللي عايشين فيها، بشر تقليد
تقاليد من برة تكوينها تبان هيبة
نتمسك بيها في الظاهر
حاوية في جوفها كل مظاهر العيبة
ما هي اصلا دنيا المظاهر

فيها الشّر متأصّل على كل لون
آآه من وصمك يا زمن مجنون
مقيدنا بروح فاضية، مليانة بوهم وراسم العفَّة
شرَّك راسخ في النفوس، لابس لي وشاح بيتخفَّى
أنا رافضة..
رافضة أعيش والدنيا قاسمة عقولنا نصِّين
نص عينه في الجنة!!!
ونص مش لاقي له عين
مش لاقي العين، عشان يحلَم ويتعشم
ماهو اصل سرُّه بيألمه، ف ازاي بألمه يتكلم
ح نتعلّم!!
نعيش حياتنا واضحة ونواجه
ونخلّي الحلم يفرح، بجمال تحقيقه في الواقع
وبلاش
بلاش نحيا وسرِّنا مكتوم
وكأن الحلم جوانا
إتكتب يعيش محروم
ومَختوم
مَختوم يا صَك الحِلم بوشمَك الشَّرقي
لا عارف تخطِّي حدودَ ولا فيك الأمَل مَرئي