مقلب التدريب

#يوميات_مهندس_مشاكس

يكتبها تامر راغب

واحد ابن حلال قوي عمل فيا مقلب طلع من دماغي .

البيه راح منزل اعلان علي الفيس بوك عن تدريب في شركتي ، وأفاد ان التدريب مجانا للمهندسين .

وانا اصلا لا اعرف هذا الشخص ولا عمري شفته ولا سمعت عنه .

والبيه اضاف في الاعلان انه من يرغب في التدريب في هذه الشركه المحترمه فعليه ارسال السيره الذاتيه علي الايميل المرفق ، وراح حاطط الايميل الخاص بي في العمل .

انا حضراتكم لقيت مهندسين جمهوريه مصر كلهم باعتينلي مقدمين طلب للتدريب . وجهاز اللابتوب عندي هنج من كتر الايميلات ، كل دقيقه بلاقي مايقرب من ١٥٠ ايميل بينزلوا وراء بعض .

ومعظم اللي باعتين الايميلات بيسألوني عن نوعيه التدريب ومكان التدريب وتوقيته علشان يجهزوا نفسهم للتدريب ، مع دعوات لي بالستر والخير واليمن والبركات .

واحد من حبايبي وراني الاعلان علي الفيس واسم الشخص اللي عمل فيا المغرز ده الله يسامحه .

بعت للشخص ده وقولتله انت مين ادالك الايميل بتاعي ومين سمح ليك تنزل ان في اعلان في شركتي عن تدريب ، تصدقوا مش بيرد علي اللي خلفوني وتقريبا عملي بلوك .

ياربي هو انا ناقص ، الناس دي بتعمل معايا كده ليه وانا العبد الفقير الي الله اللي ماشي جنب الحيط

الصبر من عندك يارب

أسعد الله اوقاتكم
دامت الابتسامه علي وجوهكم
ودمتم بخير