ذكرى أمي

شعر: أسماء كامل

في ذِكرىٰ أمِي يمكِن اكتِب
بَس هكتِب عنهَا إيه!!
أكتِب واقُول زَي اللّي قَالوا!
رَص الكَلام رَاح يوصِف ايه؟!
دِي اللّي صَبرِت
واللّي ضَحِت
واللّي مِن أيَّامهَا نَسجِت
كُل لَحظِة حُب فَرشِت
م الحنَان نمشِي عَليه!
طَب بَس هَكتِب عنهَا إيه؟!

اللّي ضَمّة قَلبها بتشفِي الأنِين
اللّي كَات مِن فرحهَا بتِروي الحَزين
اللّي كَانِت روحهَا صَافيَة
اللّي لمسِة ايدهَا دافيَة
اللّي رَقيِة خُوفهَا عافيَة
حتّىٰ نَبـع غضبهَـا دافِي
لَو دُوقتُه مرّة تعُود إلِيه
طَب بَس هَكتِب عنهَا إيه؟!

أمِي شجرَة بفَرع طارِح
طَرحُه بيِزيد بالسنِين
وَقت الجَد طِير وشامِخ
فِكر راسِي جنَاح رَزين
دِي اللّي سندِت
واللّي كَفِّت
واللّي وَقت البَرد دَفِّت
وامَّا وفِت عُمرَها
فَرعَها راح يطرَح ايه؟!
طَب بَس هَكتِب عنهَا إيه؟!

أُمي كَات للحُب جَامعَة
فيهَا دَرسوا مَعنى الخِير
أمي كَات للأهل جَامعَة
يحبَّها صغَيَّر وكبِير
دِي اللّي راضِت
واللّي شِهدِت
واللّي مَرّة ف يُوم مَاظلمِت
واللّي وَقت خلَافنَا حكَمِت
حَق صَاحبُه يعُود إليه
طَب بَس هَكتِب عنهَا إيه؟!

أمِي كانِت سِت راضيَة
مهمَا الأسىٰ يخبَّط بيبَان
أمِي كانِت عِزوَة كَافيَة
تشهَد لهَا ابعَد جيرَان
هيّ اللّي ضمِّت
واللّي لَمِّت
واللّي بَعد البُعد فَرقِت
ومِن سماحِة قلبَها
كُل البَشر بِكْيِت علِيه
طَب بَس هَكتِب عنهَا إيه؟!