اصابة حماة شيماء سيف بفيروس كورونا
كشف المنتج محمد كارتر ، عن اصابة والدته بفيروس كورونا، بصورة من أحد مستشفيات العزل.
وعلق كارتر على الصورة عبر حسابه الشخصى على"إنستجرام"قائلا : "أصعب إحساس ممكن الإنسان يحسه وقت دخول مستشفى العزل وأنت رايح تسيبلهم أمك، إحساس بفقدان الحياة ليك ولأمك، إحساس بالوداع، ساعتها بتشوف شريط حياتك بيعدي قدام عينك، في لحظة بتشوف وهي واخداك من إيدك أول يوم مدرسة، بتشوف وهي بتحرم نفسها من متع الحياة علشان أنت تلبس كويس وتتعلم كويس وتاكل كويس، بتشوف ضحكتها في وقت فرحك، بتشوف دموعها في وقت حزنك".
واضاف كارتر: "بتشوف روحك بتتسحب منك بمجرد ما تدخل طرقة مكان العزل لأن ساعتها بتحس أنك في فيلم رعب ودوامة، إحساس بالغرق في البحر، نفسك بيتقطع، بتشم ريحة الموت حواليك، بعد شوية بتفتكر إن كل ده بسبب لحظة إهمال إنك تاخد بالك من نفسك ومن اللي حواليك.
تابع: "أرجوكم اضغطوا على أمهاتكم وبالذات كبار السن مينزلوش الشوارع ميتعملوش مع حد ولا دليفري ولو أصعب الظروف هاينزلوا يلبسوا الكمامة وميسبوش الكحول من إيدهم، تعالوا على نفسكم واشتروا أنتوا طلبات البيت وتتعقم كويس، أغلب أمهاتنا عايشين على طبيعتهم ومحدش بيعقم حاجة".
واختتم كارتر رسالته قائلًا: "اللهم إني أسألك من عظيم لطفك، وكرمك، وسترك الجميل، أن تشفي أمي وتمدها بالصحة والعافية لا ملجأ ولا منجا منك إلّا إليك إنك على كل شيء قدير".
