وجع الكتمان

شعر: أسماء كامل

أنَا فعلًا بظهَر ف الصُّورة
انَّما بَظهَر وَقت الحَاجَـة
وسَاعتهَا انا بعمِل مَبهورَة
مانا أصلِي للخِير نسَّاجة

مش عَارفة أبطَّلها الخيبَـة
ولَا عَارفة أقولهَا كِلمِة لَاء
أنَا ضِحكَة وجوُّاها تَخشيبَة
ومَرارهَا مَا عَايز يفصِل دَق

ليلَاتِي بَدَمَّـع بحَنينـِي
والصُبح بارُص الأفرَاح رَص
لِيلِي يئِن ف تَكوينِي
ونهَاري تكُون...
ضحكتِي ف النَص

يومَاتي بفكَّر وف بُكرة
بالملِّلي زي فِكري امبَـارح
واللّه أمَـاني دا لو فِكـرَة
لايكُون عقلِي أوّل طارِح

دانَـا كُل جرَاح الكُون فيَّا
منحُوتَـة بوجَع الكِتمـان
بتنَفِّس من خُـرم الإبـرَة
ومِش لَاقية من الدّنيا أمَان

ياااارب بقولهالك راحـَة
طَبطَب علىٰ قلبِي البَردَان
واوهبنِي أمَان معَ راحَة
تِغنِينِي عَن أي انسَان