الضحك للركب

بقلم: ياسمين شندي

عايز تضحك من قلبك

وحشتك المسلسلات الكوميدي اللي تضحك بجد

نفسك في لمة العيلة قدام التلفزيون كل يوم وأنتم مستنيين حلقة جديدة من المسلسل زي زمان

تعبت من المشاهد اللي كلها إسفاف وألفاظ خارجة وبتدور على حاجه محترمة؟

كل ده وأكتر هتلاقيه في مسلسل "حلوة الدنيا سكر"

المسلسل بطولة هنا الزاهد طبعاً في البداية أنا استغربت لأنها لسه صغيرة وكمان يعتبر أعمالها مش كتير لكن مع بداية نزول الحلقات اتغيرت وجهة نظري جداً لأن اللي لقيته ممثلة أنضج ومتمكنة من أدواتها ومذاكرة الورق كويس وبالعكس باين جداً أنها تعبت واجتهدت عشان تعمل حاجه تليق بالجمهور، وصراحه مبسوطة إنى بتفرج على دراما بطولة مطلقه لهنا الزاهد خصوصا إنها مبتحاولش تستغل جمالها ف ادوار وخلاص لكنها بتعتمد على موهبتها والدور اللي مكتوب.

حلوة الدنيا سكر مسلسل كوميدي وهو أول بطولة مطلقة لهنا الزاهد في الدراما وهنا بتقدم في المسلسل 5شخصيات مختلفة عن طريق 9 حكايات كل حكاية في خمس حلقات وهما "المتخصصة"،" الجريمة لا تفيد"، " 9 خطوات لقلب الرجل"، " سحر وشعوذة"

وبيشاركها محمد الكيلاني اللي بيقدم مع هنا حكايتين من حكايات المسلسل.

محمود عبد المغني المتمكن واللي هيشاركها حكاية واحدة بس.

أحمد سلطان بطل SNL بالعربي واللي دايما بيمتعنا بأدوراه الكوميدية.

ده غير العبقري محسن صبري المعروف بأدائة المميز والجميلة ليلي عز العرب، ميدو عادل، حنان سليمان، ياسمين رحمي، محمد الشرنوبي وغيرهم

وبيظهر أحمد فهمي ضيف شرف في حلقة واحدة من حلقات المسلسل.

والجميل في المسلسل أن القصص اللي اتعرضت لحد دلوقتي أحداثها خفيفة وكوميدية درامية وكمان مفيهاش مط للاحداث ومش هتزهق منه.

فكرة المسلسل كانت للكاتب الصحفي يسري الفخراني ولأول مرة شارك الفنان هشام إسماعيل في كتابة حكاية من حكايات المسلسل وده اتنقل من حوار للمنتج محمد أبو ذكري

وأخيراً منقدرش ننكر دور المخرج العظيم خالد الحلفاوي اللي واضح جدا مجهوده واللي معروف إنه بيفضل ورا الممثل لحد ما يطلع أفضل ما عنده من إمكانيات وكل الطاقة والإبداع اللي جواه.