"الخناقة مع الفيروس مش تمام".. دينا تنهار بعد تعافيها من كورونا.. فيديو
حرصت الراقصة دينا على مشاركة جمهورها فيديو روت فيه كواليس إصابتها بفيروس كورونا حتى تماثلت للشفاء وتخضع لفترة النقاهة فى منزلها حاليًا.
حيث قالت فى الفيديو الذى نشرته عبر حسابها على إنستجرام: "فى الحقيقة أنا وحشنى كل حاجة، وحشنى أمشى في الشارع، وحشنى السوبر ماركت، وكل حاجة وحشتنى جدًا، أنا مش من عادتى أطلع لايف كتير، ولكن لاقيت الناس عمالة تتكلم أنا روحت مستشفى ولا عملت إيه".
وأضافت: "فقلت لازم أطلع للناس اللى مهتمة تعرف أخبارى، أطمنهم، أنى بتعافى بعد ما اكتشفت أن النتيجة كانت سلبية، وطبعًا ده فضل ربنا عليا أنى قمت بالسلامة، أدعولى أقوم بصحة أحسن، لأن الخناقة مع الفيروس ده مش تمام، وفيروس صعب وسخيف جدًا، وبتمنالكوا كل الخير ومحدش يجيله كورونا، وخلوا بالكوا من نفسكوا جداً".
واستطردت: "اتعلمت من التجربة دى إن في حاجات كتير الواخد بياخدها اه مسلم بيها، ولكنها نعم كبيرة، مجرد النزول والمشى في الشارع نعمة مش حاسين بيها".
واختتمت قائلة: "وأنا بشوف أمى حسيت إن في جايزة كبيرة، مش حاجة عادية، وشكرًا لكل الدعم اللى خدته، ولولا أصحابى وأهلى، ما كنىش خدت الدفعة الجامدة جدًا، اللى وصلتلها، لأن الكلام ده قومنى من اللى أنا فيه، وأول حد بشكره أمى، اللى ما رضيتش تسيبنى ولا تسيب البيت، وفضلت قاعدة معايا طول الوقت، أنا اللى كنت خايفة عليها وهى ما كنتش خايفة".
وحرصت على توجيه الشكر لأصدقائها مؤكدة أنها اختارت صح كل صديق لها، واكتشفت ذلك بمحنة الإصابة بالفيروس، وخصت الفنانة القديرة نبيلة عبيد على دعمها الكبير لها.
