قريبه زوجتي

#يوميات_مهندس_مشاكس

يكتبها: تامر راغب

حدثت حاله وفاه لعم زوجتي رحمه الله عليه ، وكنا نستعد للتجمع امام النادي الاهلي للذهاب الي المقابر ودفنه .

رن جرس هاتفي لاجد احد اقرباء زوجتي يبلغني انهم وصلوا وفي انتظاري انا وزوجتي عند النادي الاهلي .

وصلت عند النادي الاهلي وقمت بالاتصال به فوجدته يقف بسيارته علي الجهه المقابله امام النادي الاهلي .

لفيت بالعربيه وركنت سيارتي امام سيارته ، ونزلت زوجتي ونزلت خلفها للسلام عليهم قبل ان نتحرك .

جاء قريب زوجتي الاول فسلمت عليه وعزيته .

ثم جاء وراءه قريب زوجتي الثاني فسلمت عليه وعزيته .

ثم من وراءهم جاءت بنت عمه زوجتي ، وكانت تلبس وشاحا اسودا علي بلوزه سوداء للعزاء وتلبس كمامه علي وجهها ، فمددت يدي للسلام عليها ، فاذا بها تتصرف معي تصرفا غريبا .

انا : مددت يدي للسلام قائلا البقاء لله .

هي : تنظر لي نظره كلها ضيق قائله مبسلمش انا علي حد .

انا : قائلا بضيق وانا في نص هدومي ، طيب بلاها سلام ياستي ، البقاء لله .

هي : نظرت لي من فوق لتحت ودون ان ترد تجاوزتني دون ان ترد .

بضرب بعيني وانا مستغربها جدا للعربيه الخاصه بقرايب مراتي ، لقيت بنت عمه زوجتي قاعده في العربيه اصلا ، امال انا كنت عايز اسلم واعزي مين .

ضربت بعيني للست اللي مرضيتش تسلم عليّ لقيتها واقفه تقريبا منتظره تاكسي .

طبعا فهمت اللي حصل ، انا سلمت علي قريب زوجتي الاول ثم الثاني ، و علشان حظي المهبب ، بالصدفه واحده معديه ملهاش اي علاقه بالموضوع ولابسه اسود في اسود .

انا افتكرتها ابنه عمه مراتي وروحت اسلم عليها ، طبعا الست لقت واحد داخل بيسلم عليها وبيقولها البقاء لله فخافت وردت قالت مش بسلم علي حد وبصتلي من فوق لتحت افتكرتني واحد جاي انصب عليها .

الصراحه مقدرتش امسك نفسي من الضحك وخصوصا لما لقيت كل قرايب مراتي اللي قاعدين في العربيه بيضحكوا علي الموقف وهم شايفينه من بعيد .

حتي وانا في العزاء لازم يحصلي موقف من المواقف السخيفه المهببه دي ، طيب اروح فين بس ياربي

لا اراكم الله مكروها في عزيز لكم
و أسعد الله اوقاتكم
ودمتم بخير