عمري اتخم

شعر: أسماء كامل

انا جايّة
ف نُص الحَدُّوتة
مَعرفش انَا
كَات إيه بِدايتها
وليه النَّاس
كِدة مَبسوطة
أتَاريني سَاعِدت
ف كِمالِتها

طَب والّٰله لو اعرَف
دا ح يحصَل
أنا كُنت
رفَضت ومَحضَرتش
ولاغيت الدّايَة
انّها تفضَل
تتلكَّع
وتقول مايضُرّش

أهي بلوىٰ من
ضمن بلاوي
خلينا نحسِّن
ف عيشتنَا
مش ناقصَة نطَبطَب
وندَاوي
والزنقَة تزوِّد مرَارتنَا

وف لَحظة اتغَفِّل
عُمري اتخَم
وفَجأة
لَقتني ف حُضن
الهَم
أنا اللّي بطَبطَب
وبدَاوي
ويَاريتنِي لَقيت
في حَد
اهتَم

أهي دُنيا..
ومسيرهَا هَتِخلص
ظَالمِين فيهَا اللّي
بيخلِص
إنَّما ف الأخِرَة
فِي رَب كَريم
ح يكافِيء قلبَك
لو مُخلِص