الفنانة ندى عصام: التمثيل كل حياتى وبعشق الاقتصاد

قالت الفنانة الشابة ندى عصام، إنها تحب عملها جدًا، فالتمثيل تُخرج طاقتها فيه وهو كل حياتها، كما أنها أيضا تعشق الاقتصاد ولذلك فكرت أن أفتح مشروعي الخاص، وهو عبارة عن عربة أكل لتقديم السندوتشات.

أضافت "عصام"، خلال لقائها مع الإعلامية منال سلامة، في برنامج "حلو الكلام"، المذاع على قناة "صدى البلد"، أنها عرضت الفكرة على والدها فرحب جدًا مع الأخذ في الاعتبار أنها فتاة وستنزل إلى العمل الميداني الذي من المحتمل أن يجلب لها بعض المتاعب، معقبة: "جدتي هي اللي علمتني الطبخ من وأنا عندي 8 سنين بعمل كل الأصناف، وده اللي أداني الدافع إني أعمل مشروعي اللي بفهم فيه".

وتابعت: "روحت ورشة تصنيع عربيات الأكل فى منطقة النحاسين وطلبت تصميم عربية أول ما عينك تقع عليها تعرف أن صاحبتها بنت، وسميتها بوجي وطمطم.. أنا حبيت الفكرة جدًا.. هي مش حرام ولا عيب وكمان مختلفة إلى حد ما عشان كده عملت للموضوع دراسة جدوى بسيطة، ونفذتها كما ينبغي عشان كده مفيش معوقات قابلتني غير ارتفاع الإيجار اللي عالي عليا وأنا لسه معملتش زبون".

وأكملت: "بحاول أقدم منتج حلو ولذيذ ونظيف وسعره قليل ومناسب، بس كله رايح للإيجار بالإضافة إلى أن معايا الشيف ربيع بيساعدني في تجهيز الطلبات والدليفري، لكن بعد كده إن شاء الله الدنيا تظبط".