" اللعبه "

يوميات مهندس مشاكس

يكتبها: تامر راغب

منذ عده سنوات قليله كنت اتمشي في
محل كمبيومي " Compume " كعادتي كل فتره لاتابع كل ماهو جديد عندهم .

بعد ما انتهيت من تجوالي ، نظرت بعيني صوب اليمين فرأيت المنظر الآتي :

شاب في أوائل العشرينات يقف امام شاشه تلفاز كبيره وعمال ينط ويتمايل بجسمه امام التلفاز بطريقه مضحكه جدا

وقفت مشدوها اتابعه ثم علت وجهي ابتسامه كبيره وانتظرت احد العاملين في المحل ان يتوجه لهذا الشاب لينهره عما يفعل .

اخذت الابتسامه علي وجهي تتزايد الي ان انقلبت لضحك هستيري من جانبي وبصوت عالي علي منظر الشاب و مايفعله .

وابتدأ جمع من الناس بالضحك ايضا

واخيرا توجه اليّ انا احد العاملين في المحل وهو يضحك قائلا لي :

هو : مساء الخير ياافندم

انا : بضحك وعيناي تدمعان من الضحك
" مساء النور "

هو : حضرتك بتضحك علي ايه ياافندم

انا : الشاب اللي عمال يتنطط هناك ده امام التلفاز ، الظاهر انه مش طبيعي ، شايف عمال ينط ويتمايل ازاي

هو : حضرتك ده بيلعب .

انا : انتبهت في دهشه قائلا : بيلعب يعني ايه ؟

هو : دي حضرتك لعبه اسمها “ Wii ”

انا : التفت في حده للناس اللي واقفه ورايا عماله تضحك ، لقيتهم كانوا عمالين يضحكوا علي ضحكي وعلي جهلي

طبعا انسحبت في هدوء وانا في قمه الاحراج

ياجماعه انا آخري كانت لعبه الاتاري اللي بتتلعب بدراعين وتتوصل باسلاك بالتليفزيون

أسعد الله اوقاتكم
دامت الابتسامه علي وجوهكم
ودمتم بخير