وصيّة قلب

شعر: أسماء كامل

حاسَّة كأنّي
بقُرب المُوت
جَايِز حتّىٰ
جِهِزلِي تَابُوت
مَاهو أصل العُمر
ضُروري هَيخلَص
بَس يَاترىٰ
علىٰ إيه هَنمُوت

عُمرِنَا أصلُه
يَادُوب أمتَار
نُص سَعادَة
ومِتر مَرار
حِلو ومُر أكِيد
بِنعيـشُه
أقَدَرنَـا ف إيد
الجَبّـار

لَو جِه معَادي
افتِكروا مَحَاسنِي
وإدعُولِي دَايمًا
يزدَاد حُسنِي
وَقت لُقَـايا
بِـوَجه كَريم
بالخِير يعلىٰ
ويزيِد وَزنِي

وان حَد فيكُم
يُوم زَعَّلتُه
يَاريت يسَامِحني
وينسىٰ عَدَاوتُه
أيّام عُمرنَا
واللّٰه مَعدودَة
كِفَايَة علينَا
مُـر قسَاوتُه

وقُولُوا كَانِت
قلبَها طَيّبَ
دَمعِ الطيّبَة
ف عينها قُرَيّب
وبتِدعِي حتّىٰ
لِلّي أذوهَا
تترجَّى ربِّهـا
ليهَا يطيّب

قُولوا كمَان
كَان نِفسهَا تِفرَح
وشَجَر الحُب
ف قَلبهَا يطرَح
كَات شَايفَة كُل
النَاس حبَايبهَا
بَس النَاس كَات
فيهَا بتِجرَح

وابقُوا افتِكروا
كَمان أولَادِي
هُمّا اصلُهُم
اتنِين و وَحَادي
جواهُم قَلب بَريء
وحنَيّن
قَلبِي يَارَب
عَليهُم رَاضِي