السجل المدني
يوميات مهندس مشاكس
يكتبها : تامر راغب
" الاسماء بالاسفل غير حقيقيه بالمره "
اخذت يوم اجازه و ذهبت الي السجل المدني لاستخراج بطاقه الرقم القومي لابني فارس .
طبعا زي ما انتم عارفين اني مليش حظ في المصالح الحكوميه علشان كده كنت بقدم رجل واخر التانيه .
خدنا رقم انا وابني وجلسنا في انتظار فرج الله .
ثلاثه شبابيك ولا يعمل منها غير شباك واحد و موظف واحد اللي شغال وبطيئ كالسلحفاه .
وانا جالس في انتظار الدور بتاعنا والجو خانق والدنيا زحمه وانا مش طايق نفسي اصلا ، لقيت ست كبيره في السن ، سابت كل اللي موجودين في القاعه وجت تقولي ياابني والنبي ممكن تساعدني املأ البيانات بتاعه البطاقه .
انا : حاضر ياحاجه ، بس انا مش معايا قلم .
هي : حجيبلك قلم حالا ياابني ، الله يكرمك ويسترك يارب .
انا : تحت امرك ياحاجه
هي : خد ياابني الورق اهو املأ منه البيانات
انا : ببص في الورق لقيت الورق خاص بشاب في اواخر العشرينات تقريبا ، فقولتلها ايه ده ياحاجه هو الورق ده بتاع مين ؟
هي : الورق خاص بابني ياحبيبي .
انا : كتبت اسم ابنها محمد
واسم الاب حسين ،
ومش عارف اقرأ اسم الجد وعمال اقول البنهس .....الهبنس .......
لقيت واحد من ورايا من الناس اللي بترمي عين وودن معاك بيقول الهيرسي .
هي : ايوه يابني الهيرسي .
انا : العنوان عماره كم ياحاجه ؟
الشخص اللزج خلفي : عماره ٤ الدور الثالث
انا : بانفعال ، جري ايه ياجدع انت
انت دافس راسك معانا وعمال تبص وتقولي البيانات بتاعه الحاجه
ما تتفضل حضرتك تملي الاستماره بدالي وتخلصني .
والتفت اليه في غضب لانفجر في وجهه فهالني مارأيت .
وجدت الشخص اللي عمال دافس دماغه معانا وبيمليني البيانات هو نفسه نفس الشخص الذي امسك بورقه بين يدي وصورته في الورق
انا : نظرت الي الست الكبيره وقولتلها هو ايه اللي بيحصل ده وهو ابنك ليه ياحاجه مش بيملأ الورق بتاعه ؟
هي : اصله مش بيعرف يستقرأ يا ابني .
هو : يامه بلاش فضايح هو انتي لازم تكسفيني كده قدام الناس .
هي : موجهه كلامها لي : كمل ياابني الله يسترك .
انا : وانا علي مضض والجو حر ومخنوق :
حاضر ياحاجه ،
طيب الحاله الاجتماعيه ايه ؟
متزوج ولا مش متزوج ؟
هي : تقريبا متزوج .
انا : بصوت عالي وبضرب بأيدي علي الورق : ايه هو اللي تقريبا ياحاجه ماهو يامتجوز يامش متجوز
هو : متجوز يااستاذ متجوز .
انا : آخر شهاده تم الحصول عليها ايه ؟
هو : دبلون يااستاذ .
انا : دبلوم ازاي وانت مش بتعرف تستقري
هي : ياابني اكتبها دبلون وخلاص .
انا : ياحاجه والنبي
اكتبها دبلوم ازاي ، هو اي حاجه والسلام .
هو : اكتبها دبلون من فضلك .
انا : اسم الزوجه ايه ؟
هو : مريم ، لا سوسن سوسن
انا : التفت بغضب وبصوت عالي ، هو انت مش عارف مراتك اسمها ايه ، هو في ايه بالضبط .
هو : يااستاذ اهدي بس شويه ، اصلي مراتي ليها اسمين ، اسم في البطاقه "سوسن " واسم دلع في البيت " مريم "
انا : وانا مالي باسم الدلع ، انا عايز اسمها اللي في البطااااقه .
هنا انتبهت ان الناس اللي قاعدين متابعين الحوار من اوله وعمالين يبصوا عليا ويضحكوا .
يعني ياربي آجي اساعد الاقي الناس عماله تضحك عليا انا واولهم ابني عمال يضحك ومش قادر يمسك نفسه .
ياربي هو انا موعود بالناس دي بتكعبل فيهم
اسعد الله اوقاتكم
دامت الابتسامه علي وجوهكم
ودمتم بخير
