يوم المُنىٰ

شعر: أسماء كامل

دا يوم المُنىٰ
يوم
مَا تجِيني
وتريَّح قَلبي
السَهران

واقسِم بالدَّمع
اللّي ف عِيني
راح اخلِّيك
مَلِك الأزمَان

لاتشُوف الدُنيا
علَىٰ جبينِي
ولا تشكِي
ف مَرَّة بحِرمَان

باللِّيل ف منَامَك
تِلاقِيني
تصحَـالي من
الشُّوق هيمَان

وتقُول دي
حُوريَّة من الجَنة
بجَمالها انَا
عاشِق ولهَان

والسِّحر ف عينهَا
بحُور حِنَّة
صَبغِتهَـا تقوّي
العيّان

مِن حُسنهَا
هغرف واتحنّىٰ
وامشيلها من
الشُوق
سَكران

لو بينّا جِبال
وبتبعِدنا
جُوانـا مِن
الشُّوق بُـركان

ح يخلّيك تيجِي
ومطَّمِن
دا انا حُضني
بردًا وأمَان

هاتجيني ولّا
هاتستنى؟!!
ما ترُد ياسيد
الفِرسَان!