سر رفض بهاء الدين محمد طلب عمرو دياب بتصوير أغنية "تنسى واحدة"
أعلن الشاعر الغنائي بهاء الدين محمد عن سبب رفضه تصوير أغنية "تنسى واحدة" التي قام بتأليف كلماتها وهي من غناء الفنان عمرو دياب.
وكتب بهاء الدين محمد عبر حسابه على فيس بوك قائلا: "كل واحد مهما عاش حكايات أو عاش حكاية مبسوط فيها وراضي بيها برضه في خياله واحدة سابت علامة في قلبه بيفضل طول العمر فاكرها يا بخير يا بجَرح، ومهما قابل أو عمل نَفسه ناسى بتبان عليه وخاصة لو في حياته واحدة بتحبه وعارفة ماضيه بتبقى مشاعره مكشوفة ومتشافة رغم المجهود اللي بيعمله علشان يبان ناسي، وكل حد بيقرأ الكلام ده دلوقت عارف مين هي وهي عارفة إنها هي وعارفة مين حَبها وسابتله حاجة يفتكرها بيها لحد آخر لحظة في حياته .
وأضاف: "وهو ده ملخص فكرة تنسى واحدة ولما عمرو دياب قال لي هنصورها قولت له بلاش، ضحك وقال لي أول مرة أشوف شاعر مش عايز يصور أغنيته، قولت له كل واحد في خياله واحدة وكل واحدة عارفه إنها في خيال واحد ولما تتلخص الواحدة دي في بنت موديل مهما كانت جميلة وكلها إحساس هتقلل من حالة الأغنية يعني نسيب الأغنية تبقى كل واحدة بتسمعها شايفه نفسها هي البطلة فيها، وبرضه كل واحد شايف حبيبته هي بطلة الأغنية وكده نبقى حافظنا على خصوصية الفكرة وعشان كده كل اللي بيسمعها بيعيش بيها وفيها وبيلاقي فيها حكايته اللي مش ناسيها ولا هينساها".
