مــــات الكـــلام

شعر: أسماء كامل

مِش لَاقية كَلام
بَس انا جوَّايا كَلام وكتير
جوَّايا أسئِلة مالهَاش تَفسير
مِحتَاج تَبرير

تَبرير أو حتَّىٰ يَدوب إخطَار
جوَّانا القَهــر يكُــح مَـراااار
عايشين فِ النــــاااار

نـار وبتِحرَق في حشَانا
مِن غير مانمُــوت
كاتمِين فِ الصّوت
عَايشين في تابُوت

تَـابوت خوِّفنَـا من الاسيَـاد
عَايشينهَا عباد..
لَجـل التَجديد!!!
دلوقتي خَلاص عايشِنها عَبيد

عَبيد الغُـربة والتَحويش
عَبيد الصَدقة والبَـقشيش
وكمَـان تَهميش

تَهميش بيـذل اللّي جَـابونا
ولا فكّروا حتَّىٰ يجَـاوبُونا
طَب رسُّونا!!

رسُّونا علىٰ بَـر نعدِّي
خَلُّـوني أحِس بخِـير بَلـدي
عَـــاااايز أرضي!!

أرضِي اللّي شقايا معمَّرها
وخبطِة فَاسي تخضّرها
شَـاربين نَـارها
شَـايلين عَـارها
ولا خَـدنا ف مرَّة الّا مَـرارهَـا

ومَـررها معشِّش فِ الأيَّـام
وبقَسوة يموّت ف الأحـلام
مـات الكَلام!!
مـات الكَلام!!
لمَّـا ضَاع حِلمنا
وسط الزِحام
مـات الكَلام!!
لمَّـا غَرَسوا ف قلبِنا
زور السّـلام
مـات الكَلام!!
لمَّـا زَرَعوا ف ارضِنا
جِـذور الحطام!!!
مَـاات الكَـلام...