هجرونا

شعر: أسماء كامل

واهو كله سراب
كل اللي فات من حلمنا
قتله الغياب
زرعنا حُب ف ارضِنــا
طرح العذاب
عالم كداب.
بيبني مكان خطاوينا
ف سُور
ويحفر بدل الضحكة
كسور
عالم مغرور
بيغير من شوق ملامِحنا
ويشق دروب للّي جارِحنا
خان مطارِحنا
ودفَّىٰ قلوب مسكُونة بغِل
خلّىٰ الخطوة بحُب تذِل
أنا قلبي اتذَل
علشان بيقرّب ويــداوي
أنا قلبي ليه دايمًا غاوي
دايمًا ناوي
يدور على جرحه بإيده
وان طاب الجرح بيعيده
أدمن قيدُه
مش قادر يفرح غير بيهُم
ولا يوهب ضحكته غير ليهُم
ساكِن فيهُم
ياقلبي ارتاح من وجعك خِف
بكرة مدار الساقية يلِف
البحر يجف
وييجي الدور ع اللّي باعونا
وافتكروا الكُل ونسيونا
دول هجــرونا!!!