غــــــــــــــــــــــــابة

شعر: أسماء كامل

وسحَـابة معتِّمــة
قفَلِت بيبان الضوء
رفعت إيدي لفوووق
وجِّهت صوتي للسَّما
يااااارب
بحَق صوت تعبَـان
عايش وَحيد
إرحَم ضَعيف
عشمَــــان
بحِماك تمِد الإيّـد
مأذي من الإنسان
ومصبَّره التَوحيد
يااااارب
يامالِك الملكوت
انا جاية ليك اشكي
أصرخ بعلو الصوت
مِن همّي ليك أحكي
وجعي مِداده شطوط
وبين ايديك ببكي
يااااارب
ياجابِر القلوب
أجـبُر في يوم قلبي
تعِبت من الكروب
الحُزن ليه صــاحبي
إبعد عنّي الذنوب
عافيني من كربي
ياااارب
بقدرتك ع الخَلق
قويني نجيني
إظهِر ف يوم الحَق
م الجرح داويني
وبحق سيّد الخَلق
يااااااااااارب
راضيني