من ذكرياتي في الكليه
يوميات مهندس مشاكس
يكتبها: تامر راغب
" مصاريف الكليه "
المقلب ده كان علي مجموعه من الطلبه حظهم التعس حطهم في طريقي .
المقلب احتاج ورقه كبيره ولسته باسماء الدفعه وانتقيت عشره اسماء خمسه اولاد وخمسه بنات وانا اصلا لاعرفهم وكتبت في الورقه الآتي :
" السيد الدكتور : ( ........) برجاء السماح للطلبه الآتيه اسمائهم بالتوجه فورا الي مكتب اداره شئون الطلبه لاتخاذ اللازم تجاههم حيث انهم لم يقوموا بدفع المصاريف المقرره حتي الان و بعد ان وصلنا الي الترم الثاني من العام . و شكرا اداره شئون الطلبه .
وقبل ما يدخل الدكتور بثواني حطيت الورقه علي المكان اللي بيحط عليه شنطته من غير ما حد ياخد باله .
دخل الدكتور ولسه حيبدأ المحاضره راح ماسك الورقه وقعد يقراها في سره وراح باصص للدفعه بغيظ وراح قايل:
الطلبه اللي حقول اسمائهم يتفضلوا يقفوا وقعد ينده علي الاسماء وكل ما ينده علي اسم يقوم صاحبه او صاحبته و علي وجوههم قمه الذهول والخوف والتساؤل .
بعد ما كل الاسماء اللي نده عليها الدكتور وقفت راح مديهم سيل من التوبيخ من العيار الثقيل " انتم مستهترين يعني ايه قربنا علي آخر السنه وانتم مدفعتوش المصاريف لغايه دلوقتي ، دي مهزله بجد " .
احد الطلبه الواقفين : بس حضرتك انا دفعت المصاريف .
وردد الباقي نفس الجمله في ذهول .
الدكتور : بلاش كلام فارغ يعني هي شئون الطلبه غلطانه ، اهم باعتين ليا ورقه باستدعائكم فورا وراح مزعق فيهم اتفضلوا حالا لشئون الطلبه من غير كلام ، انتم حتضيعولي وقت المحاضره بتاعتي .
وخرج الطلبه في ذهول من المحاضره متوجهين الي مكتب شئون الطلبه .
بعد حوالي عشره دقائق باب المدرج بيخبط فتح الدكتور باب المدرج لقي الطلبه واقفين بيقولوله : " حضرتك شئون الطلبه بيقولوا انهم مبعتوش لحضرتك اي ورقه لاستدعائنا واحنا والله العظيم دافعين المصاريف ".
طبعا ضجت قاعه المحاضره بالضحك والدكتور مش عارف يسكت الطلبه من كتر الضحك
وطبعا كذا واحد من اصدقائي المقربين ابتدوا يبصوا عليا بعد ما تأكدوا ان محدش عملها غيري .
كانوا حيودوني في داهيه الله يسامحهم .
أسعد الله اوقاتكم ودمتم بخير
