ظروف

كلمات: ياسمين حافظ

بتقابلنا ظروف
ويحوشنا خوف
ونجري ورا الأحلام
عايمين في بحر الخوف
مستعجلين نوصل اوام
من غير قلق وفكر تعبان
لكن قدرنا نشوف
في طريقنا مشقة وعناء الظروف
نتخبط هنا وهناك
وما بنقدر ع الوقوف
تصبح وشوشنا بهتانة بلون مخطوف
ويفقد لساننا نطق الحروف
وعقولنا تغرق في بحر الأفكار
وقلوبنا من جواها قايدة نار
ونعيش في دوامة القلق والخوف
لكن ما بنقدر أبدا ع الوقوف
بنشق طريقنا مهما كان قاسي
ونتحدى الصعاب والمآسي
مكملين مسيرتنا
وهدفنا نوصل ع البر الراسي
تمنعنا ظروف
وتحوشنا ظروف
عن أحبة وصحبة
صبحوا في حياتنا ضيوف
لكن بيفضل حبهم في قلوبنا
رغما عن كل الظروف
وتفضل معانا حكاياتنا
محبوسة في صندوق ذكريات مكشوف
تفضحه عيوننا بحنينها لماضي جواها معروف
ومهما كانت في حياتنا الظروف
عمرها ما هتمنعنا عن حب حقيقي عشناه
ومهما كان حايشنا الخوف
عمره ما يوقفنا عن حلم العمر اللي بنستناه