" الامتحان "

يوميات مهندس مشاكس

يكتبها: تامر راغب

كنت لسه داخل الكليه جديد ومش معروف في الكليه قبل ما اتعرف من كتر المقالب اللي عملتها في الكليه خلال الفتره العصيبه دي لزمايلي وزميلاتي .
يمكن منظري الجد و النظاره وشكلي الجد المحب للعلم.......كان بيبعد عني اي شبهات او شكوك من الطلبه او الدكاتره .
المهم قررت اعمل مقلب في الدفعه كلها بلا استثناء وقعدت افكر فتره طويله
ايه المقلب اللي اعمله في الدفعه وفي نفس الوقت ميضرش حد ، واخيرا اهتديت الي الفكره الجهنميه دي .
اخترت يوم من الايام اللي بيبتدي فيها اليوم بسكاشن لنفس الماده لكل الدفعه في نفس التوقيت .
روحت الكليه بدري ودخلت كل السكاشن وكتبت علي البورد بالتباشيره الآتي :
" برجاء الاستعداد لامتحان ماده ( ......)
الاسبوع القادم في ميعاد المحاضره لجميع ماتم دراسته من اول العام.
برجاء اخبار جميع الطلبه في بقيه السكاشن وشكرا "
وزي ماتوقعت .
دخلوا الطلبه والمعيدين السكاشن وقبل ما معيد الماده يمسح البورد ، راح مبلغ الطلبه بنفسه ان في امتحان الاسبوع القادم ولازم الكل يستعد .
خلص السكشن وطلعوا الطلبه وقابلوا بعضهم وكل واحد يقول ان المعيد بتاعه بلغهم ان في امتحان الاسبوع الجاي ويرد عليهم الطلبه التانيبن من بقيه السكاشن ان ايوه المعيدين بتوعنا بلغونا برضو .
ومش عايز اقولكم .....الطلبه المناشير المتعطشين للعلم والتعلم سابوا كل حاجه في الاسبوع ده وكل همهم يذاكروا المنهج من الاول استعدادا للامتحان المرتقب .
وناس تروح تصور ملازم
واسأله من هنا ومن هناك
والمعيدين عمالين مش ملاحقين علي الطلبه في الرد علي اسألتهم واستفساراتهم .
الناس بقي اللي كانت قاعده في المدينه الجامعيه مروحوش آخر الاسبوع ده علشان يخلصوا مذاكره المنهج .
كل ده وانا متابع طول الاسبوع المهازل دي وبضحك ضحك هستيري علي اللي انا شايفه
الي ان جاء يوم الامتحان المنتظر .
دخل الدكتور المدرج ولسه حيبتدي المحاضره راح واحد من زمايلي سأله .
زميلي : دكتور بعد اذن حضرتك هو الامتحان دلوقتي ولا آخر المحاضره .
الدكتور : امتحان ايه !!!!!!
زميلي : الامتحان اللي حضرتك قولتلنا عليه الاسبوع اللي فات .
الدكتور : انا قولتلكم ان في امتحان الاسبوع اللي فات ؟
همهمات في قاعه المحاضره .....والدكتور قعد يخبط علشان الكل يسكت .
زميل آخر : ايوه يادكتور ده اللي اتبلغنا بيه .
الدكتور : ومين اللي بلغكم بكده .
الدفعه بنفس واحد : المعيدين حضرتك .
الدكتور : وازاي المعيدين يعملوا حاجه زي كده من غير ما يرجعولي .....انا ليا تصرف تاني معاهم....دي مهزله .
زميل آخر : يعني مفيش امتحان حضرتك .
الدكتور : امتحان ايه ....انتم معاتيه .
وابتدي الدكتور المحاضره وطبعا مفيش حد منهم مركز في اللي بيتشرح .
و تأكد كل الطلبه انهم كانوا ضحيه لمقلب من المقالب الثقيله وقتها
ومحاولات مستميته منهم انهم يعرفوا مين اللي عمل فيهم كده
بس الحمد لله محدش عرف يوصلي وقتها .
دي كانت البدايه ولكن لسه مكانوش يعرفوا ان المقالب الثقيله لسه جايه وان اللي حصل ده كان مجرد تسخين من العبد لله
أسعد الله اوقاتكم
ودمتم بخير