انا بخاف من البحر

يوميات مهندس مشاكس

رؤية: تامر راغب

كنا من فتره في العين السخنه بنقضي يومين مع حبايبنا .
وخلال نص الاسبوع اللي كنا بنقضيه هناك كان يوم عيد ميلاد مراتي حبيبتي
المهم عامل حسابي قبل ما الساعه تيجي ١٢ ص
اقولها كل سنه وهي طيبه
صاحبي وحبيبي اللي كنا مسافرين معاه هو واسرته تعب جدا واضطرينا نخرج بالعربيه انا ومراتي ومراته علشان نجيب ليه دواء من الصيدليه .
رجعنا من الصيدليه و كانت الساعه عدت ١٢ صباحا ولسه مقولتش لمراتي كل سنه وهي طيبه .
ودار بينا الحوار التالي :
انا : تعالي حبيبتي نروح نقعد قدام البحر شويه .
مراتي : طيب اسبق انت وانا جايه وراك .
انا : سبقتها وجهزت قعده قدام البحر علي طول
وشغلتلها اغنيه فيروز " شايف البحر شو كبيييير "
وصلت مراتي اخيرا ودار الحوار التالي علي انغام اغنيه فيروز التي تعشقها زوجتي .
والقمر والنجوم يزينون السماء فوقنا .
انا : شايفه البحر ياحبيبتي
مراتي : ايوه
انا : انا بخاف من البحر جدا
مراتي : بدون رد
انا : البحر غدار ملوش امان ابدا .
مراتي : بدون رد ورفعت حاجبها الايمن
انا : طول عمري بخاف منه
مراتي : تاااااااامر
هو انت جايبني هنا تخوفني يا تامر ولا ايه..؟؟؟!!!
انا : بس بجد صعب عليا جدا سيدنا يونس لما رموه في البحر .
مراتي : تنظر لي باندهاش شديد
انا : ولا لما التقمه الحوت...!!!
مراتي : هو انت جايبني دلوقتي علشان تحكيلي قصص الأنبياء...!!!
وراحت قايمه وخدت بعضها وطارت ، وانا عمال اجري وراها مش لاحقها لاني ميت علي نفسي من الضحك من رد فعلها .
مش قادر افهم هو ايه اللي ضايقها ؟
ماهو انا كنت مشغلها اغنيه فيروز اللي هي بتحبها
تفتكروا هي ايه اللي ضايقها ؟؟؟؟!!!!
أسعد الله اوقاتكم
ودمتم بخير