اكصدام العربيه
يوميات مهندس مشاكس
يرويها: تامر راغب
الاكصدام الأمامي لعربيتي القديمة كان كل شويه يقع واقعد اثبته .
و مكسل اروح لحد يضبطهولي .
بس اتعودت قبل ما اركب العربيه اشيك عليه واتأكد انه متلصم .
ولما يقع اثبته تثبيت مؤقت لغايه ما وقتي يسمح واروح لحد يثبته .
المهم نزلت اروح مشوار من المشاوير الحكوميه الرزله اللي انا بتخنق منها .
ركنت عربيتي ونزلت .
طبعا المصلحه اتعقدت ومخلصتشي كالمعتاد .
نزلت وانا بغلي من الغيظ .
مش كفايه اني مخلصتش المشوار
لا كمان انزل الاقي اكصدام العربيه واقع علي الارض. " المصائب لا تأتي فرادي "
لا وأحيانا بنقابل ناس عجيبه الشأن في وقت غريب .
متطفله بطريقه غريبه
يقعد يبصلك ويتنح ويسنح .
وتبقي نفسك تديله بوكس في وشه علشان تشلفط وشه و ترتاح .
انا ربنا وعدني بواحد منهم واقف متنحلي علي الرصيف جمب العربيه عمال يتفرج عليا وانا عمال اثبت الاكصدام وعمال يقرب مني وانا مخنوق بثبت الاكصدام بيشوفني بثبته إزاي .
الساعه كانت حوالي الواحده ظهرا والجو حر جدا وانا بنضح عرق ومش طايق نفسي .
والبعيد مش يخلي عنده دم ...... دافس دماغه معايا وعمال يشوفني بثبت الاكصدام ازاي .
آخر ما اتخنقت من اللي خلفوه روحت واقف قدامه ولزقت وشي في وشه وبصتله من فوق لتحت نظره كلها خنقه و احتقار .
وهو ولا هنا نفس التتنيحه ومبرقلي بكل وقاحه ......ناس بجحه بجد والله .
و بكل تناكه الدنيا و بعد ما صلحت الاكصدام روحت مطلع مفتاح العربيه علشان اتوكل علي الله .
لسه بحط المفتاح في العربيه .......لقيت اخونا التنح الرخم الرزل الغتيت ده راح مقرب مني قوي وراح قايلي
هو : انت بتعمل ايه في عربيتي ياجدع انت ؟ .
انا : ببصله بذهول وبعدين بصيت ورايا لقيت عربيتي واقفه علي بعد مترين .
بلعت ريقي بصعوبه وحسيت بهبوط حاد في الدوره الدمويه وعمال ابصله ومش قادر ارد .
هو : عمال تخبط في عربيتي وتثبت الاكصدام وانا عمال ابصلك علشان تلم نفسك وتتلم..... وانت ولا هنا .
انا : بصوت مبحوح ....اسف اصل انا افتكرتها عربيتي ....اصل عربيتي واقفه هناك اهي حضرتك وهي نفس النوع واللون .
هو : بطلوا اللي بتبلبعوه ده .
"الواحد بجد بيحط نفسه في مواقف بايخه جدا ".
مش متنيل مصلح اي اكصدام عربيه تاني
اسعد الله اوقاتكم
ودمتم بخير
