عيد ميلاد حمايا

يوميات مهندس مشاكس

رؤية: تامر راغب

مراتي : خلي بالك ياتامر ......حنعمل عيد ميلاد بابا يوم الخميس عندنا هنا في البيت .
انا : طيب متخليه يوم اجازتي الجمعه او السبت .
مراتي : لا مينفعشي علشان عاملينهاله مفاجئه .
انا : لا بقي .....اذا كانت مفاجئه يبقي تمام .
" بيني وبين نفسي "
مع اني مش فاهم ايه المشكله لما المفاجئه تبقي الجمعه او السبت ؟؟؟!!!!
بس ماشي .....لازم اقول حاضر ......... حكم القوي .
مراتي : والنبي ياتامر ما تكسفنا قدام بابا المره دي .
انا : عيب عليكي ياحبيبتي .....متقوليش كده تاني .
مراتي : ربنا يستر .
يوم الخميس هلا بالخميس :
كان يومي في الشغل كله غيوم وضغط وشد وجذب .....اليوم عدي علي خير بس كنت راجع منهك وتعبان ونفسي انام .
لاااااا انام ايه ....صحصح كده ده النهارده عيد ميلاد حمايا العزيز .
وصلت البيت وغيرت هدومي واخدت ولادي علي جمب وقولتلهم ابوس ايديكم لو لقيتوا عينيا بِتْغّرَبْ ........ اعملوا دوشه كده وحركه علشان اصحصح واعدي الليله علي خير .
ياولاد مش ناقص مشاكل مع امكم
وصل حمايا بسلامه الله وحمده .....ووصلت اخت مراتي بسلامه الله وحمده........وقمت باستقبال رائع كما ينبغي......... زي ما الكتاب بيقول .
شويه حوارات مع حمايا .
ريموت التليفزيون في ايدي عمال أعلي و أوطي واقلب في القنوات علشان اصحصح .
يادي النيله عيني بتقفل وحيحصل زلزال في البيت .
استر يارب .
عمال اقوم واقعد وادخل المطبخ وارجع تاني اقعد مع حمايا .......وعيني عايزه مشابك تفتحها .
# هو انا الصراحه آخر حاجه فاكرها ان حمايا كان بيتكلم معايا .
وبعدين .........
بَتْقّلِبْ لقيت نفسي كنت حقع من علي الكنبه .
وقمت من النوم مخضوض لقيت نفسي نايم علي الكنبه ومفيش حد معايا في الريسيبشن .
ايه ده هم راحوا فين ؟
لحظات ولقيت ابني الصغير جاي بيقولي :
ابني : بابا قوم علشان جدو عايز يسلم عليك قبل ماينزل .
انا : ايه ........ينزل فين هو مش حنعمله عيد ميلاد ؟
ابني : يابابا ده احنا اتعشينا وعملنا عيد الميلاد و طفينا الشمع من بدري .
انا : يخرب بيتكم محدش صحاني ليه ؟
ابني : يابابا غلبنا كلنا نصحيك .
قمت طبعا اسلم علي حمايا وهو نازل .
ومش عايز اقولكم مراتي ضاربه وش خشب معتبر .
وانا مش عارف انطق .
# مفيش اعياد ميلاد تتعمل في بيتي بعد كده .........مفهوم ولا مش مفهوم .
ده انا اللي بقول وبصوت واطي علي فكره .
" ادعوا لأخيكم فانه الآن يُسْأَلْ "
أسعد الله اوقاتكم
ودمتم بخير