كراكيب
كلمات: ميادة الشربيني
كراكيب بتموت فينا حاجات
واخده جوانا كتير مساحات
وبتخلق بينا وبين حبايبنا
حواجز وبتخلق مسافات
وجرالكم زي إللي جرالنا ؟؟
أيوه اتغيرنا
وخدتنا الدنيا ف سكتها
واطبعت صوره لملامحنا
عنوان لبداية حكايتنا
ودا يبقا قدرنا
وحياتنا إختلفت ميت درجه
بقا ليلنا كتير زى نهارنا
وبقينا بنشبه بعضينا
ف الفرح ساعات بنتلاقى
لكن ف الحزن
إترسمت أكتر خطاوينا
أيوه اتغيرنا و غريبه
تشابه أقدارنا
لا بإيدك قدرك تختاره
ولا ليا ف قدرى أنا قرار
مين فينا هيقوى ويتحمل
مين يصمد أو مين هيكمل
دى خفايا وللغيب أسرار
لكن
جوانا لسه الإحساس؟؟
بنحس بأوجاع الناس ؟؟
لو كان جوانا شوية مر
تانيين جواهم المر آمر
مش هقدر أعمم
خير أو شر
الناس ف ظروفهم مختلفين
عقليه وتفكير أو تكوين
فيهم نرجسي فيهم مضطر
فيهم متواضع فجأه إتغر
مش حادث طارئ لأ
تغيير إنسان محتاج لسنين
أفعال الدنيا جارت ع الكل
والتغيير طالنا بدون تمييز
ف قلوب البعض
إتحولو ناس أعداء
كانو يوم ف قلوبهم
حد عزيز
أيوه اتغيرنا
وكتير مننا عايشين
على ذكرى زمان
وحنين لوجوه وحنين لمكان
مش بردو معايا اتغيرنا ؟؟
وجرالكم زي إللي جرالنا
وبقينا ندور ع الماضى
ف كبار السن
ف عجوز بيئن
ف الناس البركه
إللى هنفضل لوشوشها السمحه
نشتاق ونحن
ونفوق م الوهم على الذكرى
بقا ماضى خلاص
إحساس بالعجز العقل إتهز
إحساس بيجن
الماضى دا ذكرى ومش راجع
والغايب عنا خلاص فاتنا
لا شايف ولا حاسس ولا سامع
مبقاش موجود ف زمان ومكان
وإتشال ف العقل
خانة النسيان
وكتير مننا أشباه إنسان
وضمير عمال ع القلب يزن
كراكيب بتموت فينا حاجات
واخده جوانا كتير مساحات
وبتخلق بينا وبين حبايبنا
حواجز وبتخلق مسافات
مش قادرين نتخلص منها
مع إنها واضحه وحاسينها
وبنعمل نفسنا آل صامدين
وبنتعامل بهدوء وثبات
تركيبه غريبه ومش مفهومه
خلقتها جوانا الكراكيب
أحاسيس معكوسه ومش ملموسه
لخبطه بهدوء مفيهاش ترتيب
بنحب ونكره بنداوي ونجرح
وساعات نمدح وساعات بنعيب
أوقات طبطبه جواها تعنيف
عاقلين ف حاجات وحاجات تخريف
حتى التضحيه إللي بإرادتنا
إحساسها خنيق ضيقه وتكتيف
كلمات بحروف مكتوبه بخوف
محفوره ف عقلنا شايلينها
كركبه جوانا ساكنه و عايشانا
بزحامها حياتنا شاغلينها
راكنين على جنب الأحاسيس
قافلين ع العقل بترابيس
أحلامنا إتقلبت كوابيس
ومادومنا رضينا واستسلمنا
جرس الإنذار شغال بيرن
إحساس بالعجز العقل إتهز
إحساس بيجن
ليه إتغيرنا !!!
