اسم الله (الرحمن)

رؤية: شيماء أبوزيد..

كان ولا زال وهتفضل سيرتنا لحد آخر عمرنا هنتكلم ونفهم أجمل وأسمى وأحلى الأسماء والمعاني.
ولا يحلى كلامنا إلا بذكر الله ثم الصلاة على رسول الله صل الله عليه وسلم...

وزي ما اتفقنا إن أسماء الله الحسنى ٩٩ اسما وفي كمان أسماء ربنا سبحانه وتعالى لم يعلنها لنا واستأثرها عنده في علم الغيب.
وفي كمان أسماء وصفات خاصة بالله سبحانه وتعالى فقط ولا يصح أصف بيها إنسان؛ والاسم أو الصفة اللي معانا النهاردة هيا خاصة بالله سبحانه وتعالى فقط وهو إسم (الرحمن)

الرحمن جل جلاله
الرحمن: الإسم اللي بقوله على طول في البسملة لما اقرأ القرآن أو زي مااتفقنا لما ببدأ اي حاجة بقول (بسم الله الرحمن الرحيم)
ومعنى اسم الرحمن ياحلوين :إن الله سبحانه وتعالى هو صاحب الرحمة حنين وطيب على كل المخلوقات وعلى كل الناس رحمة ربنا دائمة ومستمرة على المسلم والكافر الصالح والفاسد واللي في قلبه خير واللي في قلبه شر ربنا رحيم بيه ومستمر في عطائه للكل في الرزق والصحة والنعم الكتير اللي ربنا خلقها لينا...

يعني ممكن مثلا يكون واحد بيقول كلام مش حلو او بيكذب ويستخدم نعمة الكلام اللي ربنا خلقها له غلط وبيإذي الناس بلسانه؛ ورغم كدة ربنا سبحانه وتعالى بيكرمه ويرزقه وبيتم نعمه كلها عليه (فاللهم لك الحمد والشكر كما ينبغي لجلال وجهك وعظيم سلطانك على جميع نعمك وعلى رحمتك بنا ياالله ياأرحم الراحمين).
واسم الرحمن ياحلوين ذُكر في القرآن الكريم مثل قوله تعالى (قل ادعوا الله أو ادعوا الرحمن)
يعني ممكن ادعي واقول (يارب يارحمن أتم عليا كرمك وعطائك ورحمتك).
وقال كمان في القرآن الكريم (وإلهكم إله واحد هو الرحمن الرحيم)
وقال الله تعالى في حديث قدسي و(الحديث القدسي) هو قول الله تعالى أيضا وبلغنا به سيدنا محمد صلى الله عليه وسلم عن الله.
قال الله تعالى (أنا الرحمن، خلقت الرحمة وشققت لها خصلة من إسمي؛ فمن وصلها وصلته ومن قطعها قطعته)

وخصلة ياحبايبي معناها:صلة القرابة أو صلة الرحم يعني قرايبنا كلهم اللي يسأل عليهم ويصلهم ويزورهم ويرحمهم ربنا سبحانه وتعالى يكرمه ويوصله بكل آماله ويوصله بطريق الجنة ومن قطع رحمه وعامل أهله أو مامته وباباه بطريقة مش كويسة ربنا بيزعل منه وطبعا كلنا نحب إن ربنا سبحانه وتعالى يكون راضي عننا ويوصلنا بكل حاجة حلوة فيها توصلنا بربنا وبالجنة.

(فاللهم إجعلنا من البارين بأهلنا الواصلين للرحم المتصلين الدائمين بالله)
حبايبي الحلوين تعالوا نتفق من دلوقتي نتصف بالرحمة عند معاملة كل الناس.
نقتدي بأسماء الله ونرحم الدواب والحيوانات...

ونكمل المقال القادم رحلتنا مع أسماء الله الحسنى سائلين الله الهداية والرشاد