كان زمان

شعر - أحمد خليفة:

مدرس لغة عربية بجده

البيوت مش بالحيطان
البيوت بالحب تحيى وبالحبايب والجيران
البيوت الصافية عايشة كل حاجة بقلبها
تعشق الضحكة الجميلة
تعشق السهرة الطويلة
تعشق الأحلام تدفي كل أيام عمرها
ترتوي حب وأمان
البيوت الدافية كانت كل لحظة فيها خير
كل لحظة فيها راحة
حب مليان بالصراحة
خيرها عايشه كل واحد كل شارد كل طير
كل ده كان من زمان
والنهاردة ليه ياعالم ليه بيوتنا بقت حيطان؟
مش مهم ساكنها مين
مش مهم الطيبين
المهم الكل قاعد جوه بيته ولا السجين
فين جيران العز راحوا
كل جار بتزيد جراحه
حتى قلبي وانشراحه
جوه حيطُه معسكرين
امتى نرجع تاني نحكي: البيوت مش بالحيطان
البيوت بالطيبين