زياره حمايا

يوميات مهندس مشاكس

يكتبها: تامر راغب

الصراحه حمايا نادرا ما يجي يزورنا في البيت .

تكاد تكون مرات زياراته لنا معدوده علي اصابع اليد الواحده .

بس المشكله اني بكون راجع هلكان من الشغل وبمجرد دخولي البيت ببقي عايز ارمي نفسي علي السرير وانام من الارهاق وتعب اليوم .

لقيت مراتي حبيبتشي بتكلمني وانا راجع من الشغل وبتقولي بابا جاي يزورنا النهارده ، وياريت تصحصح كده اثناء الزياره ، وتتكلم كده معاه وتفتح معاه مواضيع .

انا : حاضر

المهم وصلت وانا خلصان .

وبعد ماسلمت علي حمايا قعدت معاه في الليڤنج ، ومراتي قعدت جمبي .

وطبعا كل شويه عيني تروح في النوم ، واصحي علي زغده من مراتي
مره في كتفي
ومره في جمبي
وكل مره اصحصح بشهقه
آه والله
تخيلوا حمايا عمال يتكلم ويلاقيني فجأه بشهق

طبعا اكيد شايف بنته بتزغدني .

وكل مره اقوم فيها مخضوض كده ، مراتي تزغرلي وتوطي عليا وتقولي فووووق شويه عيب ما يصحش كده
هو انت مبتسترش خااااااالص .

المهم كنت عايز اجيب مشابك افتح بيها جفوني والله ، وفي الآخر حصل ما كنت اخشاه .

ايوه اللي في بالكم حصل ، روحت في نوم عميييييييق .

ومراتي زهقت مني فسابتني نايم وانا قاعد علي الكنبه وراسي مرميه لورا ، واديتها شخير .

انتفضت من نومي علي صوت مفاتيح حمايا وهو بيحطها علي الترابيزه وهو بيقوم و بيقول طيب اقوم انا .

طبعا عملت نفسي قال يعني صاحي ومن غير مايكمل الجمله قولتله : مينفعشي حضرتك كده لسه بدري انت حضرتك لحقت تقعد معانا ؟!!!!

لقيت حمايا بيبصلي وهو بيبتسم ، وقالي انا داخل الحمام

طبعا مش عايز اقول لحضراتكم وش مراتي كان عامل ازاي ، قولتلها بعد ما حمايا دخل الحمام ، ياحبيبتي والله افتكرته حيمشي .

طلع حمايا من الحمام وطبعا اخد مفاتيحه ونزل

وكان اسبوع مدوحس حضراتكم علي دماغي ودماغ اللي خلفوني

وكل ما تفتكر الموضوع ده تزعل بجد .

اسعد الله اوقاتكم
ودمتم بخير