طيِّب ياشوق
شعر: أسماء كامل
طيِّب ياشوق
يامعشّش ف قلوبنا
وبتكوي ف العروق
هنقدر امتى ننسى
ولّا منك يوم نفوق
يا مطوّل ف السنين
يا مصحي فينا ذكرى
قايدة جوّانا الحنين
هاييجي امتى بكرة
نفسي افرح لو يومين
ياساكن ف الاهات
يامعذب فينا روحنا
ومبكينا ع اللي فات
امتى يهدى
ف يوم وجعنا؟
إمتى تصبح ذكريات؟
ياصاحي ليل نهار
ياسارح بين جوارحي
ومعلِّم بإنكسار
لو تنسى
ف يوم ملامحي
أو تسيبلي الاختيار
هداوي بإيدي جرحي
ويومها هعلن الانتصار
