الطفل الخجول ...
رؤية: شيماء أبوزيد
كلنا شوفنا اطفال فيهم صفة الخجل و بيعتمدوا علي اهاليهم اعتماد كامل في كل حاجة لدرجة انهم ساعات بيبقوا عندهم خجل او مكسوفين من اهلهم نفسهم
من اول سنة في عمر الطفل بنقول ماهو لسه صغير و بيتكسف عادي لكن المشكلة بتظهر لما يبتدوا يتعاملوا مع ناس بره البيت غير اهاليهم في الشارع و زمايلهم في المدرسة و النادي . الأهل يستسلموا لفكرة انه خجول و يتعاملوا معاه علي كده و ان الخجل طبع مش هايتغير.
تعالوا نعرف الاول ايه هو الخجل؟
الخجل ده في الغالب حالة طبيعية جداً بتبدأ عند الأطفال من سن سنة لما نشوفه اول مايشوف حد غريب يدور وشه في ناحية تانية او او يغمض عيونه او يعيط.
لكن لما موضوع الخجل ده يزيد و يستمر معاه لفترة طويلة نعرف انه عنده حالة نفسية اسمها ( الاضطراب التجنبي ) و دي ظاهرة بتظهر علي الطفل في صور كتير زي انه ( وشه يحمر، ايده تسقع، ريقه ينشف، نبضات قلبه بتزيد ).
ايه تأثير الخجل علي الأطفال؟
١- الخجل بيأثر علي الطفل و يعمله اضطراب في النطق و ساعات تأخر في الكلام و ده مش هايخليه يتواصل بشكل طبيعي مع الناس و بالتالي هايبقي عايز ينعزل عشان مايشوفش حد و يتكلم معاه ده غير انه ممكن يكون سبب في تأخر دراسي.
٢- الطفل الخجول دايماً بيبقي متردد و ماعندوش ثقة في نفسه و حابب الانطواء و العزلة و بيتكلم بصوت واطي جداً و بيبتسم كتير و بطئ في ردود الأفعال و الاقوال.
٣- في المدرسة دايماً يفضل يقعد علي الكراسي الخلفية او الجانبيه عشان يستخبي من انظار زمايله و المدرسين.
٤- و لو اتحط في تجمع مع ناس غريبة عنه او حتي تجمع عائلي هاتلاقيه وشه ابتدي يحمر و اتضايق من كتر السلامات و الاسئلة عن اخباره و دايماً مشغول بتقييم الناس له.
الفرق بين الخجل والحياء
طب مش ممكن إبني يكون بيتكسف عشان هو مؤدب ؟
هاقولك لازم نفرق بين الحياء اللي بيمنع الشخص من انه يعمل حاجات غلط عشان يحافظ علي كرامته.
و بين الخجل اللي بيمنع الشخص عن التعامل مع الناس و يخاف من فكره الكلام معاهم من غير سبب .
طب اضرار الخجل ده ايه؟
١- الخجل بيخلي قدرة الطفل ضعيفة اجتماعياً و بالتالي بيضعف مهاراته مع اسرته و زملائه..
٢- بيصيب الطفل بالكسل و الخمول عشان كده نشاطة بيكون محدود.
٣- الطفل الخجول بيبعد عن اي شخص بيلومه او بينتقده علي اي تصرف بيعمله و بيبقي مش بيتشجع يعمل اي حاجة جديدة عشان يتجنب النقد و بالتالي مش هايتعلم حاجة جديدة و هايبقي خبرته ضعيفة و هايبقي عالة علي اهله و يتكل عليهم في كل حاجة.
٤- بسبب اعتماد الطفل الخجول علي اهله و عدم علاجه من ظاهرة الخجل هاتبقي المرحلة الدراسية صعبة جداً عليه بالاضافة الي انه هايكبر و العلاقات الاجتماعية كمان هاتبقي أضعف لان الخجل هايمنعهم من المشاركة في التهنئة في المناسبات و الزيارات و التجمعات العائلية.
٥- الطفل الخجول ادائه في المدرسة بيبقي ضعيف عشان الخجل بيمنعه يسأل المدرسين عن الاجزاء اللي مش فاهمها في الشرح و لو حد من المدرسين سأل سؤال الخجل بيمنع الطفل انه يقوم يجاوب علي الرغم من انه عارف الاجابة الصح لكن موقف انه يجاوب و الانظار تبقي منصبه عليه تخليه يحس بالخجل .
طب ايه الاسباب اللي بتخلي الطفل خجول؟
١- القدوة
يعني الطفل الخجول غالباً بتكون أمه أو أبوه نفسهم بيعانوا من موضوع الخجل
٢- طريقة معاملة الاب و الام لطفلهم
الناس اللي بتبقي قلقانة علي اطفالهم زيادة عن اللزوم و تفضل مرقباه دايماً بغرض الحماية بيمنعوا الطفل من الانطلاق في المجتمع و الاستمتاع باللعب و التواصل مع زمايله. و برضه الشدة في التعامل مع الطفل و توبيخه علي اي خطأ و بالذات قدام زمايله بيخليه يحس بالنقص و يفقد ثقته في نفسه و بيلجأ انه يستخبي عن عيون الناس.
٣- لما تكون الاسرة نفسها منطوية و قافلين بيتهم عليهم هما و اطفالهم بعيد عن التعاملات الاجتماعية الصحية و مانعين اطفالهم من الاختلاط بجرانهم و زمايلهم و قرايبهم بشكل طبيعي ده هايخلي الأطفال تتعود علي العزلة و الانطواء.
٤- ضعف القدرات العقلية
غالباً الخجل بيكون ناتج عن عدم قدرة الطفل علي التعبير لان احياناً جسمه بيكبر بسرعة و عقله مابيكبرش بنفس السرعة والتناقض في سرعة الجسم و العقل بيخلي استيعاب الطفل و قدرته في التعامل و التعبير عن شعوره ضعيفة لان عقله مش ناضج كفاية عشان يدور علي كلام و صيغة مناسبة يعبر بيها و ده بيخليه يحس بالخجل.
٥- الاحساس بالنقص
اقوي سبب في ظهور الخجل عند الطفل هو الاحساس بالنقص . ممكن يكون بسبب اعاقة في جسمه، عنده تقوص في رجله، قصير جداً، تخين جداً، رفيع جداً، سمعه ضعيف.و ممكن يحس بالنقص بسبب مصروفه القليل عن زمايله في المدرسة او ادواته المدرسية و هدومه. ( هنا لازم ننوه لموضوع مهم جدا وهو الرضا والقناعه والثقه في النفس هيا الحل والعلاج الأكيد . مش انك تديله مصروف زياده او انك تخبي الاعاقه او الوضع اللي هو فيه . بالعكس غرس الثقه في النفس مع الرضا والتحفيز هو أهم خطوه ممكن تاخدها لأبنك)
٦- المشاكل الاسرية
لو الاب و الام عندهم مشاكل كتير مع بعض بيخلي الطفل خايف و مش حاسس بالامان و نفسيته تتأثر و يبعد عنهم و يفضل الانطواء و من هنا تيجي ظاهرة الخجل.
طب هانعمل ايه مع الطفل الخجول؟
أولا لو اتكلمت مع طفلك الخجول عن الخجل او زعقتله و وبخته و اتريقت عليه النتيجة هاتبقي عكسية تماماً و هايزيد عنده الشعور بالخجل (يعني لازم تتعامل مع الموضوع ده بحكمة شديده وتبقا عارف ان الموضوع هياخد شويه وقت مفيش تغيير لحظي وفوري)
عشان كده لازم نعمل التالي:
١- لازم الاب و الام يعرفوا مصدر الخجل عند طفلهم و ايه المواقف اللي بيخجل منها و يحاولوا ييشتغلوا علي انه يواجهها بشكل تدريجي .
٢- لازم الام تخبي قلقلها و خوفها المبالغ فيه عن الطفل و تديله فرصه يعتمد علي نفسه و يواجه شوية مواقف اجتماعية بثقه و هدوء وتديله المساحه الخاصه اللي هتخليه يبني ثقه في نفسه وتدفن شويه القلق المبالغ فيه.
٣- خليه يشترك مع مجموعات من جيرانه او زمايله في لعبه و يكتشف هوايته و يتعلم مهارات معاهم و ده هايخليه يحس بوجوده و كيانه و يخلصه من خجله لما يبتدي ينجح بين المجموعات دي لأنه هيلاقي نفسه وبتشجيعك له هيتحمس أكتر ويطلع برا دايره الخجل شوية شوية.
٤- درب ابنك علي التعامل في المواقف الاجتماعية مع الأطفال و الكبار بشكل تدريجي و من غير إجبار يعني مثلاً خليه يدخل عليكم كده و انتم قاعدين بتتكلموا و سيبه يقعد شوية لحد مايحس بالامان و بعدين اسأله قوله اخبارك ايه في المدرسة النهارده؟
اديله مساحة يتكلم و يحكي موقف كوميدي حصل له قدام الكل ويشوف تفاعل الناس وتشجيعهم له هيخليه عاوز يكرر التجربه كذا مره .
٥- شجع ابنك يطلب اللي هو عايزه من غير خوف او احراج و علمه ازاي يعبر عن مشاعره و رغباته بشكل سليم .
٦- احكيله قصص و مواقف عن اطفال بيتمتعوا بالشجاعة و كانوا مميزين بالجراءة في بعض المواقف.
٧- خليه يشترك في أنشطه مسرحيه (تعتبر من أفضل الطرق لحل موضوع الخجل بشكل كبير وبينصحوا بيه أخصائي تعديل السلوك)
نصيحة: اوعي تفكر ان ابنك عشان بيحب يقعد في اوضة لوحده معزول و هادي يبقي طفل مثالي و مؤدب
الحياء و الأدب صفات جميلة لكن الخجل سلوك ممكن يأخر نمو ابنك العقلي و تقدمه الدراسي و تعاملاته الاجتماعية بشكل كبير
لازم تساعده عشان يتخلص من الخجل و تعالجه لان التربية السليمة مش بتطلع طفل خجول و منطوي
لازم توفر لابنك الدعم و تمنحه الثقة بالنفس علشان يكون في المستقبل أفضل رجل في المستقبل
