بعد ازمة تحرش الجامعة الأمريكية.. فنانة شهيرة تروي قصصها مع التحرش منذ الطفولة
وظهرت أبو ضيف في بث مباشر على حسابها الشخصي بـ”انستجرام”، تحدث فيه عن المواقف التي مرت بها، فقالت: “كنت حابه أتكلم في موضوع الولد اللي اتحرش واغتصب 100 بنت لأن الموضوع ده يهمني ويهم كل البنات اللي موجودة في مصر لأن تقريبا مفيش بنت معرفهاش متعرضتش لتحرش في حياتها من وهي صغيرة لحد دلوقتي.. لما جيت اتكلمت مع صحابي قبل كده منهم اللي حكالي قصص أنا مش قادرة أصدقها”.
واستكملت: “وفي حاجات أنا مريت بيها.. وأنا صغيرة مثلًا دكتور قرر لأن أنا بنت صغيرة وهو محل ثقة عنده الحق إن هو يقرب منى بطريقة مش مريحة ويمسكني بطريقة مش مريحة أو سواق الباص بتاع المدرسة يحط إيده على رجلي بطريقة مش لطيفة وحاجات كتير.. لكن أنا قولت لمامتي مثلًا في قصة الدكتور وعمرنا ما روحنا تاني”.
وتابعت: “أنا عايزه أقول بس اللي يحصله حاجة يروح يتكلم مع أهله والأهالي لازم تبقى حاطه محل ثقة في أطفالها إن أي حاجة تحكهالها متاخدهاش بطريقة تعنيفية أو تمنعهم بالعكس لازم يعرفوا يبنوا الثقة اللي بينهم وبين أطفالهم عشان يجوا يحكولهم أي حاجة.. عشان الواحد وهو صغير لما بيتحط في المواقف دي مبيعرفش يتصرف خالص.. وأكيد طفل صغير مش هيعرف يتصرف أو بنت عامة مش هتعرف تتصرف في حاجة زي كده، فأول حد الواحد بيبقى حابب يحكيله هو أهله”.
واختتمت ناصحة الفتيات بإفضلاح هؤلاء المتحرشين وعدم الخوف، فقالت: “قولي متخافيش وبجد متفتكرش إن أنت عندك الحق إنك تعمل أي حاجة، لأن حاجات سوشيال ميديا بتضايقنى بشوف حاجات إن واحد مدى نفسه الحق إنه يبعت صورة مش عارفه أحطها في الكلام إزاى هقولها إزاي.. بس مين إداك الحق إنك تعمل كده”، وتابعت “اللي هيفرق إن الولد ده ياخد جزاته عشان يبقى عبره لغيره والناس تعرف إن اللى بيعمل حاجة غلط بيتعاقب وبيتحاسب عليها.. واحنا المفروض منسكتش تانى المفروض لو أي حاجة حصلت من الحاجات دى نحكي ونقول لأن طول ما احنا مش بنتكلم ومش بنقول كل حاجة هتفضل زى ما هي”.
