وردتي بتتنفس

حدوتة

بقلم. شيماء أبوزيد

كان ياما كان ياسادة ياكرام ولا يحلى الكلام الا بذكر النبي عليه الصلاة والسلام...
كان في مرة زمان مجموعة أطفال حلوين بيلعبوا مع بعض في حديقة جميلة مليانة أزهار وورود ألوانها حلوة جدا، طفل منهم عجبته وردة جميلة وريحتها حلوة خالص راح قطعها من الشجرة وكل أصحابه إستغربوا جدا من التصرف ده لكن محدش منهم إتكلم ولا قال أي شيء....
كلهم خلصوا لعب ورجعوا بيوتهم طفل منهم حكى لمامته عاللي حصل وإنه متضايق جدا من تصرف زميله وزعلان على الوردة اللي اكيد خلاص فقدت ريحتها وشكلها الجميل، ماما قالتله:ليه متكلمتش وقدمت النصيحة وعرفته أن تصرفه ده مش صح؟
رد الولد وقال:مش عارف؛ بس ممكن اكون خوفت أزعله.
ردت ماما وقالت :مش صح نخاف ننصح أصحابنا واجبنا تجاه أصحابنا نصيحتهم لو لاقيناهم بيتصرفوا غلط.
تانى يوم بيلعبوا مع بعض وطفل تاني راح يكرر نفس التصرف ويقطف وردة.
قام الولد الجميل قال: حرام بلاش حد يقطف الوردة علشان كلنا نستمتع بيها وبجمالها، لما بنقطف الوردة بتحرم باقي الناس من أنه يشوف منظر الوردة الجميل، وبعدين مش انت بس اللي بتستفيد منها النحل كمان بيتغذي من الزهور ولازم نحافظ عليها علشان نحافظ على البيئة ونحافظ كمان على نقاء الجو اللي بنتنفسه...
الأطفال الحلوين سمعوا كلام زميلهم الجميل وخلاص كرروا عمرهم ما يقطعوا اي زهور تاني بس كمان هيحافظوا عليهم ويعتنوا بأي زهور حواليهم....
وحافظوا على جمال الحديقة واستمتعوا باللعب وسط الزهور الجميلة...
وتوتة توتة خلصت الحدوتة وإستنونا في حدوتة جديدة مفيدة