انا ولد شجاع

بقلم: شيماء أبوزيد

كان ياما كان ياسادة ياكرام ولا يحلي الكلام إلا بذكر النبي عليه الصلاة والسلام كان في زمان ولد جميل وشاطر بس بيخاف من كل حاجة ومن كل حاجة حواليه كان دايما شايف نفسه ضعيف وصغير وبيخاف يجرب أي حاجه جديدة وكان دايما معتمد على مامته في كل حاجة.
في يوم من الأيام راح الولد مع اصحابه في الجنينه بيلعبوا وكل مااصحابه يقولوله تعالى نلعب يقولهم:لا انا بخاف خلينا واقفين وخلاص .
أصحابه زعلوا عايزين يلعبو، سابوه واقف وراحو فعلا يلعبو وكانوا فرحانين وببتمرجحو ومبسوطين جدا .
وهو واقف وحيد وزعلان.
مامته شافته واقف لوحده زعلان راحتله وقالتله:حبيبي ليه واقف لوحدك؟! ليه مش بتلعب مع أصحابك؟!
جاوبها وقاللها:ياماما انا بخاف، بخاف جدا أتعور، أنا حاسس اني فاشل وضعيف ومش باقدر اعمل حاجه خالص.
مامته قالتله:أوعي تقول كده، انت ولد شجاع وقوى ولازم تحاول ، أنا واثقه انك شجاع جدا.
وسابته واقف ورجعت قعدت مكانها تاني ، فضل الولد واقف محتار مش عارف يعمل ايه !!!
يجرب ولا الاحسن يفضل واقف مكانه ومايلعبش.....
هو واقف زعلان انه مش قادر يلعب أو خايف يلعب قرر انه يتمشى شويه يتفرج لقب كل الأولاد بيلعبو وفرحانين.
وفي ولد صغير أصغر منه كمان بيجري وفرحان جدا وصوت ضحكته ماليه المكان .
راحله وقالله :ممكن أسألك سؤال؟
رد الطفل الصغير وقالله :اتفضل.
سأله وقالله:انت ازاي مش بتخاف!
ازاي ازاي مش خايف وانت بتجري كده ؟!
رد الولد وقال : انا لو فضلت خايف عمري ماهاقدر اعمل الحاجات اللي انا بحبها . هافضل وحيد .
الانسان الشجاع لازم يحاول ويجرب حتى لو ماعرفش لكن لازم يحاول اكتر من مرة يكفيه شرف المحاولة وكل مرة هيتعلم حاجه جديدة.
ربنا خلقنا أقوياء ولازم منخافش من أي حاجه ولازم تكون شجاع وتتعود تجرب اللي بتخاف منه لو اللي هتعمله مش خطر جرب
وحاول مع ماما وبابا لو حاجه صعبه عليك أوعي تقول مستحيل مفيش اصلا حاجه اسمها مستحيل على انسان ربنا كرمه بالعقل والتفكير. ..
مشي الولد وهو بيفكر في كلام الولد وراح لأصحابه وقاللهم:انا مش هخاف تاني والعب معاكم .
أصحابه فرحوا جداا وهو كمان كان ضحكه مالي الدنيا وكان فرحان وقرر انه هيبطل يخاف تاني ويجرب ويحاول وأصبح متأكد ان مفيش مستحيل. ..
ولو حاجه خطر أو صعبه عليك أسأل بابا وماما وخليك مقتنع أن مينفعش الإنسان يكون جبان أو خواف.
وأصبح معتمد على نفسه في كل حاجة يقدر يعملها ومامته فرحت جدا لما شافته فرحان
وتوته توته خلصت الحدوته واستنونا في حدوته جديدة مفيدة
وخليكو فاكرين ياأصحابي احنا البشر ربنا خلقنا وكرمنا بالعقل والتفكير عن باقي المخلوقات فا مش صح اقول خايف
مستحيل
مش هاقدر
خليك شجاع. واثق من نفسك. قوي